Mikið um ökumenn í vandræðum, meðal annars á Kjalvegi

Appelsínugular viðvaranir eru í gildi fram eftir kvöldi á norður- og vesturhluta landsins. Einnig er búið að gefa út gular viðvaranir víða annars staðar.Svo virðist sem að veðrið sé verst á norðvesturhluta landsins þar sem björgunarsveitir hafa þurft að sinna fjölda verkefna, og aðallega tengd ökumönnum í vandræðum á vegum úti vegna færðar.

,Það hafa komið þó nokkuð af tilkynningum um ökumenn í vandræðum út af færð, eitthvað á Holtavörðuheiði, í kringum Hvammstanga og þar, Varmahlíð. Svo hafa verið að berast tilkynningar af Austurlandi og alveg niður á Djúpavog, segir Davíð Már Bjarnason, upplýsingafulltrúi Landsbjargar í samtali við Vísi.

Ber þar helst að nefna að rúta með 37 farþega innanborðs sem rann hálf út af þjóðvegi 1 á Hrútafjarðarhálsi. Engan sakaði og var farþegum og ökumanni komið í öruggt skjól á Laugabakka, en stórvirkar vinnuvélar þarf til að koma rútunni á réttan stað á ný.

Erlendir ferðamenn í vandræðum á Kjalvegi

Þá virðist veðurviðvaranir og lokanir alveg hafa farið framhjá erlendum ferðamönnum sem hringdu eftir aðstoð upp á miðjum Kjalvegi, sem er að mestu ófær.

„Það eru erlendir ferðamenn sem hafa algjörlega mislesið aðstæður og ekki séð skilaboðin um veðrið og annað. Þeir voru heilir á húfi og allt í góði með það. Það er þjónustuaðili sem nær í bíla að fara að ná í bílinn og þá.“

Einhverjar foktilkynningar hafa borist, allt frá Vopnafirði til Bolungarvíkur en ökumenn í vandræðum hafa verið stærstur hluti verkefna björgunarsveita í dag.

„Það er óvenjumikið af umferðartengdum verkefnum á borði björgunarsveita núna í dag. Það er eitthvað sem við hefðum viljað sjá minna af, segir Davíð Már sem bendir á að ekkert ferðaveður sé á Norðvesturlandi þessa stundina.

„Það er bróðurparturinn af verkefnum, það er alveg þó nokkuð af verkefnum tengt þessari umferð, sem skýtur að einhverju leyti skökku við því að það er vitlaust veður á norðurhelmingu landsins allavega og mikið búið að vara við því að það sé ekkert ferðaveður,“ segir Davíð Már.

„Það er alltaf gott að ítreka það að fólk að spáin gerir ekki ráð fyrir ferðaveðri og það er ekki ferðaveður á norðurhelmingi landsins núna.“

Tiltölulega rólegt á Vestfjörðum

Veðurspáin var hvað verst fyrir Vestfirði en þar hafa björgunarsveitir ekki þurft að sinna mörgum verkefnum, aðallega tilkynningum um fok í Bolungarvík og á Ísafirði. Til að mynda hafa björgunarsveitarmenn sem sendir voru vestur á snjóbílum ekki þurft að sinna neinum verkefnum.

„Það hefur gengið vel, minna um verkefni á Vestfjörðum en við gerðum ráð fyrir. Enn sem komið er.“