Ný út­gáfa Windows nú að­gengi­leg notendum að endur­gjalds­lausu

Að sögn Panos Panay, framkvæmdastjóra Windows-vöruþróunar, er Windows 11 ætlað að vera ferskari og einfaldari útgáfa af stýrikerfinu. Áréttar hann að lítið sé um stórvægilegar stefnubreytingar í nýju útgáfunni og hún eigi að henta nýjum jafnt sem þaulvönum notendum.

Væntir Microsoft þess að búið verði að bjóða öllum fullnægjandi Windows 10-tækjum upp á uppfærsluna fyrir mitt næsta ár.

Breytingar á notendaviðmóti stýrikerfisins hafa vakið hvað mesta athygli að þessu sinni, líkt og oft áður. Þar er stærst sú tilbreyting að upphafsverkreinin (e. Start taskbar) hefur verið færð á miðjan skjá en hana hefur jafnan verið að finna á vinstri hlið skjásins allt frá upphafsdögum Windows.

Enn er þó hægt að breyta staðsetningunni í stillingum og því auðvelt fyrir vanafasta notendur að færa hana á kunnuglegri stað. Einnig hafa ýmsar minni breytingar verið gerðar á útliti stýrikerfisins: Horn glugga eru orðin ávöl, valmyndir einfaldari og hin ýmsu tákn og merki fengið andlitslyftingu.

Einnig hefur Windows Store verið tekið í gegn, smáforrit (e. widgets) eiga endurkomu og boðið er um á aukna samþættingu við samskiptaforrið Microsoft Teams, svo fátt eitt sé nefnt.

Panay segir í samtali við breska ríkisútvarpið BBC að Microsoft hafi lært af fyrri mistökum þar sem stórvægilegar og oft ófrávíkjanlegar breytingar á Windows leiddu til mikillar óánægju notenda um allan heim. Þar er sú ákvörðun að fjarlægja hina víðfrægu upphafsverkrein í Windows 8 framarlega í flokki.

Bætir Panay við að fylgst hafi verið vel með því hvernig fólk noti tölvur sínar í þróunarferlinu, hvað það smelli á og að hverju augun beinist að. Var tekið mið af þeim gögnum við hönnun Windows 11 sem framkvæmdastjórinn vonar að fái góðar viðtökur hjá þeim stóra hópi jarðarbúa sem þarf að eiga við stýrikerfið á hverjum degi í leik og starfi.