Sjö ára fangelsi fyrir hrottalegt ofbeldi gegn sambýliskonu

Þá þarf að hann að greiða fyrrverandi sambýliskonu sinni fjórar milljónir króna í bætur sem er tvöföld sú miskabótaupphæð sem dæmd var í héraði.

Karlmaðurinn var sakfelldur fyrir nauðgun og brot í nánu sambandi með því að hafa meðal annars tvívegis sett fingur í leggöng þáverandi sambýliskonu sinnar og gert tilraun til samræðis án hennar samþykkis. Sömuleiðis fyrir að hafa slegið og sparkað í konuna, gripið í hana og dregið á hárinu, meinað henni útgöngu af heimili hennar og kastað yfir hana þvagi.

Listi yfir brot mannsins er langur en hann var einnig dæmdur fyrir að hafa skallað konuna, sparkað í hana og sagt hana vera ógeðslega, þrengt að öndunarvegi hennar, potað í augun á henni og hótað henni lífláti auk þess að brjóta ítrekað á nálgunarbanni sem honum var gert að sæta vegna ógnandi hegðunar og áreitis.

Karlmaðurinn var einnig sakfelldur fyrir húsbrot og eignaspjöll með því að hafa brotið rúðu á heimili konunnar og farið þar inn án leyfis.

Að lokum var karlmaðurinn sakfelldur fyrir umferðarlagabrot með því að hafa ekið sviptur ökurétti og undir áhrifum áfengis.

Við ákvörðun refsingar leit Landsréttur til þess að brot hans gegn konunni voru sérstaklega ófyrirleitin, atlögur hans langvinnar og að hann ætti sér engar málsbætur. Var refsing hans ákveðin sjö ára fangelsi, að frádreginni gæsluvarðhaldsvist, og var hann sviptur ökurétti í fjóra mánuði.

Dómur Landsréttar.