Næst dýrasti janúargluggi ensku úrvalsdeildarinnar frá upphafi

Alls greiddu liðin í ensku úrvalsdeildinni um 295 milljónir punda fyrir leikmenn í nýliðnum janúarmánuði, en það er rétt rúmlega 51 milljarður íslenskra króna.

Eins og áður segir er þetta það næst mesta sem lið í ensku úrvalsdeildinni hafa eytt í janúarglugganum, en metið er 430 milljónir punda frá árinu 2018.

Kórónuveirufaraldurinn setti strik í reikninginn á seinasta ári þegar liðin eyddu aðeins samtals 70 milljónum punda í janúar, en nú virðast liðin vera að rétta úr sér fjárhagslega og geta farið að eyða meiri pening í leikmannakaup.

Það sem vekur kannski mesta athygli er að liðin í neðstu fimm sætum deildarinnar bera ábyrgð á rúmlega helmingi eyðslunnar. Everton, Norwich, Newcastle, Watford og Burnley greiddu samanlagt 150 milljónir punda fyrir leikmenn í janúar. Í fyrra eyddu neðstu fimm lið deildarinnar aðeins fimm milljónum punda.

Þá hefur nettóeyðsla ensku úrvalsdeildarinnar aldrei verið hærri síðan janúarglugginn var kynntur til sögunnar árið 2003, eða 180 milljónir punda.