Þór ansi smár miðað við borgarísjakann

Þetta sést glögglega á myndbandi sem Landhelgisgæslan sendi fjölmiðlum síðdegis og sjá má hér að neðan, en varað var við borgarísjakanum fyrr í dag.

Eins og sjá má er borgarísjakinn v-laga, og ansi stór. Áætlað er að hann sé um 250 metrar á lengd, 260 metrar á breidd og 15 metra hár.

Landhelgisgæslan telur einnig líklegt að borgarísjakinn sé strandaður, en dýpi á svæðinu er um áttatíu metrar.

„Mikilvægt er að þeir sem eiga leið um svæðið séu meðvitaðir um staðsetningu jakans. Þegar varðskipið Þór sigldi framhjá jakanum var hann á stað: 66°27,7N – 021°30,0V,“ segir í tilkynningu Landhelgisgæslunnar þar sem vakin er athygli á því að ísjakinn geti reynst varasamur, sérstaklega í myrkri.