Súper­stjarnan barðist við tárin eftir algjört klúður

Shiffrin féll í fyrri ferðinni í stórsviginu á mánudaginn og í morgun keyrði hún út úr brautinni í sviginu strax í upphafi ferðar sinnar. Shiffrin vann svigið á ÓL í Sochi 2014 og vann stórsvigið á ÓL í Pyeongchang 2018.

Hún var þannig úr leik eftir ellefu sekúndur í fyrstu greininni og það tók hana aðeins fimm sekúndur að klúðra sviginu í morgun.

Mikaela Shiffrin barðist líka við tárin í sjónvarpsviðtali NBC eftir enn eitt klúðrið. Hún sagðist hafa runnið til og ekki náð að bjarga sér.

„Þetta fær mig til að efast um síðustu fimmtán ár. Allt sem ég hélt að ég viss um mína eigin skíðamennsku, um svigið og um keppnishugarfar mitt,“ sagði Mikaela Shiffrin.

„Mér líður eins og ég hafi brugðist öllum. Það var ekkert í spilunum að ég myndi ætla mér of mikið og keyra út úr brautinni á fimmta hliði. Ég hef treyst skíðamennsku minni allan minn feril og það er það eina sem ég get treyst á. Pressan er mikil en mér fannst það ekki vera stærsta vandamál mitt í dag,“ sagði Shiffrin.

Það voru samt ekki allir ánægðir með það að hún var ekkert að drífa sig í burtu eftir klúðrið sitt heldur hékk í fýlu við grindverkið sem truflaði örugglega skíðakonurnar sem komu á eftir henni.

Shiffrin hefur unnið 48 heimsbikarmót í svigi, meira en nokkur annar skíðamaður í einni grein, karla eða kona. Það héldu flestir að þarna væri hennar besti möguleiki á að vinna gull og því algjört klúður að ferð hennar var búin eftir aðeins fimm sekúndum.

Shiffrin var andlit leikanna í Bandaríkjunum og það mátti sjá ófáar auglýsingar með henni í aðdraganda þeirra. Þetta er farið að minna svolítið á Simone Biles á Ólympíuleikunum í Tókyó síðasta sumar.

Bandaríkjamenn bundu gríðarlegar vonir til Biles að hún myndi raða inn gullverðlaunum á leikunum og alveg eins er gullpressan gríðarleg á Shiffrin.

Það var ekki af ástæðulausu. Báðar höfðu þær unnið gull á Ólympíuleikunum og auk þess verið yfirburðarmanneskjur á heimsmeistaramótum. Þegar pressan á tímum samfélagsmiðla er orðin svona svakalega virðist hún bera þessar tvær frábæru íþróttakonur ofurliði.

Hún á eftir þrjár greinar á leikunum ef hún heldur sig við að keppa á þeim. Sú næsta er risastórsvig á föstudaginn en það er grein sem hún hefur aldrei keppt í á Ólympíuleikum en hún vann hana á HM 2019. Í framhaldinu er síðan keppni í bruni og tvíkeppni.