Jussi­e Smollett laus úr fangelsi

Að því er kemur fram í frétt New York Times úr­skurðaði á­frýjunar­dóm­stóll í Chi­cago í gær­kvöldi að Smollett yrði sleppt úr fangelsinu í Cook sýslu gegn tryggingu en lög­menn Smollett færðu þau rök fyrir að hann yrði lík­legast búinn að af­plána dóm sinn áður en niður­staða á­frýjunar lægi fyrir.

Sak­sóknarar gagn­rýndu þau rök og sögðu það skapa hættu­legt for­dæmi að fresta af­plánun þegar um stuttan dóm er að ræða. Tveir af þremur dómurum við á­frýjunar­dóm­stólinn voru þó sam­mála um að sleppa Smollett gegn tryggingu og vísuðu til þess að glæpur Smollett hafi ekki falið í sér of­beldi.

Hafnar því að árásin hafi verið sviðsett

Mál leikarans hefur vakið tölu­verða at­hygli en í janúar 2019 sagðist hann hafa verið fórnar­lamb á­rásar sem hann sagði hafa grund­vallast á hatri á­rásar­manna á sam­kyn­hneigðum og svörtum. Fljót­lega kom upp grunur um að Smollett hafi svið­sett á­rásina í þeim til­gangi að vekja at­hygli á sjálfum sér

Við réttar­höld í málinu sögðu sak­sóknarar að Smollett hafi greitt bræðrunum Abim­bola og Plabinjo Osundairo til að ráðast á sig fyrir utan íbúð hans. Hafi hann fyrir­skipað þeim að setja snöru um háls hans og ýja að því að þeir væru stuðnings­menn Donalds Trump, þá­verandi Banda­ríkja­for­seta.

Bræðurnir báru vitni fyrir dómi og sagði Abim­bola að Smollett hafi skipað honum að ráðast á sig. Sjálfur neitaði Smollett því al­farið að á­rásin hafi verið svið­sett og hélt því fram að hann væri sak­laus. Í desember 2021 var Smollett síðan sakfelldur af kviðdómi. 

Þegar dómur var kveðinn upp í málinu síðast­liðinn föstudag sagðist Smollett ekki vera í sjálfs­vígs­hug­leiðingum og að ef eitt­hvað kæmi fyrir hann í fangelsinu þá væri það ekki af eigin hendi. Hann virtist þannig vísa til máls Jef­frey Ep­stein sem fannst látinn í fanga­klefa sínum meðan lög­regla rann­sakaði um­fangs­mikil kynferðisbrot hans.

Margir gagnrýndu þessi ummæli Smollett harðlega og héldu því fram að um væri að ræða enn eina tilraunina til að fá vorkun en dómari féllst þó á það að Smollett myndi njóta verndar á meðan afplánun hans stendur.