Verulega hlýtt loft á leiðinni

Veðurviðvörunin tekur gildi klukkan 14 í dag og nær til klukkan þrjú í nótt á Norðurlandi eystra en til klukkan níu á morgun á Austurlandi að Glettingi.

„Sunnan 15-23 og hvassir vindstrengir við fjöll. Snögg hlýnar og mikil leysing. Sýnið aðgát,“ segir á viðvörunarsíðu Veðurstofunnar um viðvörunina.

Í hugleiðingum veðurfræðings á vef Veðurstofunnar er nánara ljósi varpað á hvað veldur því að hlýna mun snögglega í dag.

„Langt suður í hafi hreyfist lægð að landinu, en hlýskil frá lægðinni teygir sig norður yfir landið og þokast til vesturs. Skilunum fylgir víða slydda eða snjókoma framan af morgni, en síðar rigning. Í kjölfarið kemur verulega hlýtt loft yfir landið og snýst jafnframt í hvassa sunnanátt eða storm, sem veldur talsverðri eða mikilli leysingu.“

Þar kemur einnig fram að í kvöld og nótt muni dæmið snúast við, skilin hopa til austurs og verða að kuldaskilum.

„Kólnar þá á landinu og úrkoman breytist aftur í slyddu eða snjókomu. Á morgun verða skilin komin austur af landinu og vindátt að vestan með éljum, en úrkomuminna eystra. Annað kvöld lægir síðan, léttir til og frystir víða.

Eins og alltaf þegar hlýskil fara yfir landið að vetri þarf að vera á verðbergi gagnvart lúmskri hálku, sem myndast þá jafnan á vegum og gangstéttum.“

Veðurhorfur á landinu

Norðaustan 3-10 m/s og sjókoma eða slydda S- og A-til í fyrstu, síðar rigning, fer þá að snjóa NV-til. Snýst í sunnan 15-23 m/s á A-verðu landinu eftir hádegi, en norðan og norðaustan 5-13 V-til. Hiti 1 til 9 stig, hlýjast NA-lands. Rigning S-lands, snjókoma eða slydda um landið NV-vert, en annars úrkomulítið. Vestlægari og slydda eða snjókoma SV-lands seint í kvöld og kólnar aftur.

Vestan 10-18 m/s og él á morgun, hvassast við NA-ströndina, en úrkomuítið eystra. Hiti yfirleitt 0 til 5 stig. Lægir og léttir til um kvöldið og frystir.

Veðurhorfur á landinu næstu daga

Á sunnudag:

Sunnan 10-15 m/s og rigning austast í fyrstu með hita 3 til 8 stig, en síðan vestlæg átt, 3-10 m/s og dálítil slydda eða snjókoma með köflum og hita 0 til 5 stig. Lægir, styttir upp og kólnar um land allt um kvöldið.

Á mánudag:

Suðaustlæg átt, 8-13 m/s með rigningu víða um land, en norðaustlægari og él NV-til. Hlýnar í veðri.

Á þriðjudag:

Sunnankaldi og rigning, en norðaustanhvassviðri og snjókoma eða slydda á Vestfjörðum. Úrkomulítið NA-lands. Hiti 0 til 8 stig, svalast NV-til.

Á miðvikudag:

Austlæg eða breytileg átt og dálítil rigning eða slydda með köflum. Hiti nærri frostmark.

Á fimmtudag:

Útlit fyrir skammvinna norðanátt með snjókomu eða éljum N-til, en úrkomulítið syðra. Fremur svalt í veðri.

Á föstudag:

Líklega suðaustanátt með slyddu eða rigningu, en þurrt á N- og A-landi. Heldur hlýnandi veður.