Bið eftir fyrstu tölum erfið: „Ég held að taugarnar hjá öllum fram­bjóð­endum hafi verið þandar“

Lokatölur í prófkjöri Sjálfstæðisflokksins fyrir komandi borgarstjórnarkosningar voru kynntar á þriðja tímanum í nótt. 

Hildur Björnsdóttir leiðir listann. Ragnhildur Alda María Vilhjálmsdóttir, sem sóttist einnig eftir oddvitasætinu, hafnaði í öðru sæti. Kjartan Magnússon, varaþingmaður og fyrrverandi borgarfulltrúi í því þriðja og Marta Guðjónsdóttir, borgarfulltrúi hreppti fjórða sætið.

„Ég er bara ótrúlega þakklát að finna þennan sterka og og mikla stuðning og fá þetta skýra umboð til þess að leiða Sjálfstæðisflokkinn í vor og þakka öllum þeim sem hafa stutt mig á síðustu vikum og mánuðum,“ sagði Hildur Björnsdóttir.

Prófkjör fór einnig fram hjá Sjálfstæðisflokknum í Árborg í gær þar sem Bragi Bjarnason bar sigur úr býtum.

Mikil bið var eftir fyrstu tölum í Reykjavík en upphaflega var stefnt að því að birta þær klukkan 19, klukkustund eftir að kjörstaðir lokuðu en biðin dróst á langinn og voru fyrstu tölur ekki birtar fyrr en um klukkan 22 með tilheyrandi stressi.

„Ég held að taugarnar hjá öllum frambjóðendum hafi verið þandar en þetta var erfið bið en það var mikill léttir þegar tölurnar komu svo loks.“

Ætlar að leiða flokkinn til sigurs

Ertu ánægð með listann? 

„Ég er ánægð með listann. Þetta er kröftugur og öflugur hópur af fjölbreyttu fólki og hann endurspeglar Sjálfstæðisflokkinn vel. Í þessum flokki er fólk á öllum aldri með ólíkan bakgrunn og fjölbreytta reynslu og þannig náum við að endurspegla breiddina í samfélaginu. Þannig að ég hlakka til að leiða þennan hóp til sigurs í vor.“

Hér að neðan má sjá ellefu efstu í prófkjörinu, en kosið var um níu efstu sætin:

• Í 1. sæti með 2.603 atkvæði er Hildur Björnsdóttir
• Í 2. sæti með 2.257 atkvæði í 1.-2.sæti er Ragnhildur Alda María Vilhjálmsdóttir
• Í 3. sæti með 1.815 atkvæði í 1.-3. sæti er Kjartan Magnússon
• Í 4. sæti með 1.794 atkvæði í 1.-4. sæti er Marta Guðjónsdóttir
• Í 5. sæti með 1.555 atkvæði í 1.-5. sæti er Björn Gíslason
• Í 6. sæti með 1.688 atkvæði í 1.-6. sæti er Friðjón R. Friðjónsson
• Í 7. sæti með 1.955 atkvæði í 1.-7. sæti er Helgi Áss Grétarsson
• Í 8. sæti með 2.184 atkvæði í 1.-8. sæti er Sandra Hlíf Ocares
• Í 9. sæti með 2.396 atkvæði í 1.-9. sæti er Jórunn Pála Jónasdóttir
• Í 10. sæti með 2.319 atkvæði í 1.-9. sæti er Birna Hafstein
• Í 11. sæti með 2.231 atkvæði í 1.-9. sæti er Valgerður Sigurðardóttir