Vals­menn hafa ekki unnið leik í úr­slita­keppni á Hlíðar­enda í þrjá­tíu ár

5. apríl 1992 er sögulegur dagur fyrir Valsmenn því á þeim degi fagnaði Valur síðasta sigri í úrslitakeppni á Hlíðarenda.

Valsliðið vann þá 104-91 sigur á Keflavík og náði með því að jafna úrslitaeinvígið á móti Keflavík í 1-1. Valur átti eftir að komast í 2-1 með sigri í Keflavík í leik þrjú og gat því orðið Íslandsmeistari á heimavelli 9. apríl 1992.

Keflvíkingar unnu 22 stiga sigur á Hlíðarenda í þessum fjórða leik og tryggðu sér síðan Íslandsmeistaratitilinn í oddaleik á heimavelli.

Valsliðið komst ekki aftur í úrslitakeppni fyrr en í fyrra þegar Valur mætti KR í átta liða úrslitunum.

Valsmenn voru með heimavallarrétt á móti KR í fyrra en náðu samt ekki að vinna heimaleik í einvíginu. KR-ingar unnu alla leiki liðanna í Valsheimilinu þar á meðal 89-86 sigur í oddaleiknum.

Síðustu þrír sigurleikir Valsara í úrslitakeppni hafa komið á útivelli og í raun hefur Valur unnið fimm af síðustu sjö útileikjum sínum í úrslitakeppni.

Á heimavelli sínum hafa Valsmenn aftur á móti tapað síðustu þremur leikjum sínum í úrslitakeppni.

Svo skemmtilega vill til að í kvöld eru nákvæmlega þrjátíu ár frá síðasta heimasigri Valsmanna í úrslitakeppni.

Franc Booker var stigahæstur í þeim sigri með 34 stig en Tómas Holton skoraði 24 stig og þeir Svali Björgvinsson og Magnús Matthíasson voru báðir með tólf stig.

Nú er að sjá hvort að Valsmenn nýti tímamótin til að enda þriggja áratuga taphrinu sína á heimavelli eða hvort að Stjörnumenn bætast í hóp þeirra liða sem hafa sótt sigur á Hlíðarenda í úrslitakeppnum frá árinu 1992.

Báðir leikir dagsins verða í beinni útsendingu á Stöð 2 Sport. Útsending frá leik Tindastóls og Keflavíkur hefst klukkan 18.95 á Stöð 2 Sport og strax á eftir verður leikur Vals og Stjörnunnar sýndur á sömu rás.