Náttúru­fræðingar segja stjórn­völdum að hysja upp um sig buxurnar

Félagið lýsir yfir miklum áhyggjum af stöðu Garðyrkjuskólans sem til stendur að flytja frá LBHÍ yfir til FSU. Grafalvarleg staða sé nú uppi.

„Garðyrkjunámið er orðið að bitbeini, líklega tveggja núverandi ráðherra og rektors og skólameistara skólanna. Á meðan líður starfsemin fyrir það, nemendur og starfsfólk Garðyrkjuskólans einnig. Á þessari stundu er framtíð Garðyrkjuskólans óljós með öllu.“

Skiptar skoðanir eru um fyrirætlanirnar og hafa þær víða verið gagnrýndar. Fjórum kennurum Garðyrkjuskólans var á þriðjudag sagt upp störfum og segja þingmenn nemendur og starfsmenn í algerri óvissu fyrir komandi skólaár.

Ákvörðun um flutninginn var tekin af Lilju Alfreðsdóttir, þáverandi menntamálaráðherra, í lok árs 2020 og fól hún rektor LBHÍ og skólameistara FSU að komast að samkomulagi um flutninginn. 

„Það vekur furðu að ráðherra, með einu pennastriki, taki slíka ákvörðun og er það mat félagsins að eðlilegt væri að Alþingi tæki þessa ákvörðun en ekki sé um að ræða geðþóttaákvörðun ráðherra,“ segir í áskorun FÍN.

Að sögn félagsins hafa rektor LBHÍ og skólameistari FSU ekki náð saman um málefni Garðyrkjuskólans og því liggi enginn samningur fyrir milli skólanna tveggja um hvernig flutningnum skuli háttað.

Ekki komin með vinnuaðstöðuna á Reykjum

„Það vekur furðu að garðyrkjunám við Garðyrkjuskólann sé auglýst í gegnum FSU án þess að formlegur samningur liggi fyrir um yfirfærsluna. Einnig hefur rektor LBHÍ ákveðið, [á þriðjudag], þrátt fyrir að enginn samningur um yfirflutning námsins frá LBHÍ yfir til FSU liggi fyrir, að leggja niður störf allra sérfræðinga sem starfa við kennslu við Garðyrkjuskólann,“ segir í áskorun FÍN. Ekki sé tryggt að skólameistari FSU geti ráðið starfsmennina eða að þeir muni sækjast eftir starfi hjá FSU.

Auk þess segir Félag íslenskra náttúrufræðinga að kennsluaðstaða Garðyrkjuskólans og aðrir starfsmenn séu enn undir stjórn LBHÍ og FSU hafi því ekki umráðarétt með núverandi starfsaðstöðu Garðyrkjuskólans. Þar með sé FSU ekki tryggð nein vinnuaðstaða til kennslu fyrir nemendur. 

„Þeir sem til þekkja átta sig á því að kennsluaðstaðan á Reykjum er mikilvæg og aðstaðan þarf að vera á forræði þess sem hefur umsjón og ábyrgð með garðyrkjunáminu.“ 

FÍN skorar á stjórnvöld, Alþingi, rektor LBHÍ og skólameistara FSU að grípa til aðgerða og sjá til þess að flutningurinn gangi vel fyrir sig. Í því sambandi sé mikilvægt að öllum lögum og réttum ferlum sé fylgt og réttindi og skyldur starfsmanna tryggð.

Gagnrýndu stöðuna á þinginu

Guðrún Hafsteinsdóttir, þingmaður Sjálfstæðisflokksins í Suðurkjördæmi, var harðorð á Alþingi í gær um stöðu Garðyrkjuskólans á Reykjum. 

„Það er þyngra en tárum taki hvernig stjórnvöld hafa leyft sér að láta þennan mikilvæga skóla og þetta mikilvæga nám verða hornreka í íslensku menntakerfi. Hvernig í ósköpunum gat þetta gerst?“

Oddný G. Harðardóttir, þingmaður Samfylkingarinnar í kjördæminu, vakti athygli á stöðu Garðyrkjuskólans á þingi og nefndi þar meðal annars að húsakynni skólans væru í mikilli niðurníðslu.

„Á síðasta kjörtímabili var ákveðið að færa Garðyrkjuskólann undir Fjölbrautaskóla Suðurlands en það gleymdist að flytja fjármuni til FSU og gera stjórnendum þar fært að taka við rekstrinum. Nú er allt í uppnámi fyrir næsta skólaár.“

Oddný sagði að vegna deilna milli ráðuneyta um hver ætti að gera hvað stæðu starfsmenn eftir með uppsagnarbréf í höndunum og svikin loforð ráðherra.