Telur mun ódýrara að endurræsa Elliðaárstöð en Orkuveitan áætlar

Í fréttum Stöðvar 2 var rifjað upp að í vetur vakti það athygli að á sama tíma og landsmenn brenndu dísilolíu vegna raforkuskorts stóð Elliðaárstöðin ónotuð. Orkuveitan gaf þá skýringu að það svaraði ekki kostnaði að koma henni aftur í gang.

Raforkubóndinn Birkir Þór Guðmundsson, stjórnarformaður Orkuvers ehf., hvetur Orkuveituna til að skoða málið betur og telur kostnaðinn ofmetinn.

„Ég hef nú aðeins rýnt gögn Orkuveitunnar þar sem þetta verkefni hefur verið tekið út, að endurræsa þessa stöð, og okkur sýnist að kostnaðaráætlunin sé ansi rífleg,“ segir Birkir.

Og hér talar maður sem búinn er að starfa í raforkugeiranum á þriðja áratug. Hann segist hafa komið að flestum smávirkjunum sem byggðar hafa verið á Íslandi frá síðustu aldamótum og fyrirtæki hans rekur sjálft nokkrar.

„Við erum með fjórar í rekstri og þá fimmtu í byggingu, já.“

Elliðaárstöðin varð eitthundrað ára í fyrra og er ekki verr farin en svo að sumarið 2019 sagði talsmaður Orkuveitunnar að til að koma henni í gang vantaði í raun bara nýja pípu til að leiða vatnið inn í stöðina frá Árbæjarstíflu.

„Auðvitað eigum við ekki að leggja niður mannvirki sem þessi, ef einhver möguleiki er á að nýta þau. Þó að þetta sé lítil virkjun, í þessu stóra samhengi.“

Og eins og Orkuveitumenn skoðuðu, þá telur Birkir Þór að auk nýrrar pípu væri skynsamlegt að kaupa nýja aflvél og setja niður við hlið stöðvarhússins. Orkuveitan segir endurbætur kosta hátt í milljarð.

„Okkar grófa skoðun á þessu máli liggur einhversstaðar á bilinu sextíu prósent af þeirri kostnaðaráætlun,“ segir Birkir og telur að þetta muni kosta 550 til 600 milljónir króna.

Hann tekur þó fram að hann hafi ekki allar forsendur og slær varnagla, bæði um ástand mannvirkja og einnig hvaða tillit þurfi að taka til lífríkisins við vatnsnýtingu þannig að það komi ekki niður á fiskveiði.

„Ég viðurkenni það að ég þekki ekki nægilega vel lífríki árinnar og hvort það að endurræsa þessa stöð muni hafa einhver neikvæð áhrif á lífríkið. Hér er auðvitað laxveiðiá. En það hefur verið virkjun hér í áratugi og það er enn lax í ánni.“

En ef Orkuveita Reykjavíkur treystir sér ekki, væru þeir hjá Orkuveri ehf. tilbúnir að endurræsa virkjunina og reka hana?

„Ég hef nú ekki skoðað málið með það fyrir augum. En við getum örugglega lagt eitthvað til málanna. Við höfum mikla reynslu af því að byggja smærri virkjanir þannig að ég er ekki í nokkrum vafa um að við gætum komið að þessu verkefni með einhverjum hætti, í það minnsta með ráðgjöf,“ segir Birkir Þór Guðmundsson, stjórnarformaður Orkuvers ehf.

Hér má sjá frétt Stöðvar 2: