Rangnick íhugar tilboð frá landsliði en ætlar samt að halda áfram hjá United

Samkvæmt heimildum BBC gæti Rangnick tekið ákvörðun um málið strax í dag, en það þarf þó ekki endilega að hafa áhrif á þá ráðgjafastöðu sem Þjóðverjinn ætlar að taka að sér innan herbúða United.

Rangnick á þrjá leiki eftir í starfi sem knattspyrnustjóri Manchester United, en Hollendingurinn Erik ten Hag tekur við stjórnartaumunum í sumar og Rangnick færir sig í ráðgjafastöðu eins og um var samið í haust.

Ráðgjafastarfið mun þó ekki fela í sér mikla viðveru. Samkvæmt samningnum sem Rangnick skrifaði undir þarf hann aðeins að vinna sex daga í hverjum mánuði. Hann segist vera sáttur við það þar sem hann hefur lengi haft áhuga á því að starfa sem landsliðsþjálfari og þetta gefi honum tækifæri til að gera hvort tveggja.

Manchester United tók á móti Chelsea í gærkvöldi í leik sem endaði með 1-1 jafntefli. Að leik loknum var Rangnick svo spurður út í þessi mál.

„Í kvöld skulum við tala um Manchester United,“ sagði Rangnick. 

„Ég get alveg staðfest að ég mun klárlega halda áfram í þessu ráðgjafahlutverki. Hingað til hef ég ekki talað við Erik [ten Hag], en ég er meira en til í að hjálpa til og breyta hlutunum til hins betra.“

„Þetta gefur mér tíma fyrir annað starf en það er það sem um var samið í nóvember.“