„Þá opnaði ég bara orðabók undir M og leitaði að einhverju sniðugu“

Þess má til gamans geta að „Villt fræ“ smáskífuna prýðir kötturinn Stefán Thorlacius, sem er óðum að taka yfir samfélagsmiðla Myrkva. Stefán fékk sína fyrstu sjálfstæðu birtingu um daginn á catsonamps miðlinum eða „kettir á mögnurum“.

Hvaðan kemur nafnið Myrkvi?

Í fyrstu ætlaði ég að gefa tónlistina út undir eigin nafni, en áttaði mig svo á að skírnarnafnið mitt er frekar algengt. Ég á meira að segja frænda sem heitir líka Magnús Thorlacius og hefur verið í tónlist. 

„Eftir að ég ákvað að ég vildi taka mér listamannsnafn, þá opnaði ég bara orðabók undir M og leitaði að einhverju sniðugu.“

Myrkvi greip mig strax og mér finnst það ná vel utan um tónlistina. Fallegur skuggi, það er eiginlega hornsteinninn í orðinu og mér finnst andstæðurnar í því heillandi. Ég hef einmitt gert svolítið af því að semja hress lög með angurværa texta. Mér fannst líka plús að orðið virkar rammíslenskt án þess að vera með neina séríslenska stafi.

Hvernig er þitt ferli við að semja tónlist?

Ró og næði. Ef ég finn tíma þar sem ekkert annað er að trufla mig og get einbeitt mér að fullu bara að því að spila og tjá mig, þá vella alltaf einhverjar tilfinningar upp á yfirborðið. Ég tek hugmyndirnar upp og kem síðan aftur að þeim seinna. Ef hugmyndirnar eldast vel, þá reyni ég að klára lagasmíðina. 

Textahugmyndin fæðist oft í þessu ferli og ákveðnar setningar verða stundum órjúfanlegur partur af laginu án þess að það sé fullklárað. Að lokum set ég höfuðið í bleyti og skrifa textann, sem getur tekið allt frá nokkrum mínútum í nokkrar vikur.

Hefur þú alltaf verið að semja tónlist?

Allt frá því að ég fór að grípa í gamla gítarinn hjá pabba þegar ég var táningur fannst mér langt skemmtilegast að reyna að skapa eitthvað sjálfur. Á móti kemur, þá hef ég alltaf verið frekar latur við að læra lög annarra. Að spila á gítarinn varð mjög snemma að útrás og tjáningu sem hefur fylgt mér allar götur síðan. 

„Þessar stundir einn með gítarnum eru hálfgerð hugleiðsla.“

Allt í einu opnar maður augun, eftir að hafa sönglað og spilað eitthvað, og þá er maður kannski búinn að vinna út úr einhverju sem maður vissi ekki einu sinni að væri að angra mann í sálarlífinu. 

Ég er annars farinn að semja líka töluvert á hljómborð síðastliðin ár og finnst það líka mjög skemmtilegt. Mér líður smá eins og ég sé með eitthvað galdrabox fyrir framan mig sem ég veit ekkert hvernig virkar, og það sem kemur út úr því er allt öðruvísi heldur en glamrið á gítarinn.

Hver var innblásturinn að Villt fræ?

Ég er að taka upp plötu sem er mjög stór í þeim skilningi að ég er að útsetja fyrir mörg mismunandi hljóðfæri og kasta frekar stóru neti yfir lögin af ýmsum pælingum. Platan er komin vel á veg en hún endaði á að vera frekar flókin í framkvæmd. 

Villt fræ spratt út frá löngun til þess að gera einmitt hið gagnstæða. Bara taka lag, beint úr hugleiðslunni í herberginu, og leyfa því að standa nánast óbreyttu. Ekkert vera að prófa of mikið af pælingum, og nota eins fá hljóðfæri og hægt er. 

Eftir stendur þá líka að textinn verður þeim mun mikilvægari og skiptir eiginlega öllu máli. Ég myndi segja að ég sé að fara aftur í ræturnar en ég ólst mikið upp við að hlusta á söngvaskáld. Ástæðan fyrir því að ég vildi læra betur á gítar var að geta plokkað eins og Simon og Garfunkel.

Finnst þér munur á því að semja fyrir Vio og fyrir þig sem Myrkvi?

Ég spái sjaldnast í því þegar ég sem lög. Upphaflega varð Myrkvi til út frá lögum sem ég hafði sýnt strákunum í Vio en þeim hafði ekki fundist passa fyrir bandið. 

„Það mætti segja að fyrsta Myrkva platan hafi verið samansafn af lögum sem Vio hafnaði!“

Eftir fyrstu Vio plötuna þróaðist þetta líka svolítið þannig hjá okkur að í staðinn fyrir að ég kæmi með heilsteypt lög á æfingar, þá fórum við að reyna að semja þau meira saman. En stundum sem ég lög sem ég einfaldlega heyri fyrir mér í Vio hljóðheiminum, sem ég myndi segja að sé mjög einkennandi þökk sé gítarsnillingnum Yngva Holm.

Hvað er framundan hjá þér?

Það er nóg framundan. Ég mun spila aðeins hérlendis með Myrkva í sumar, ásamt því að halda áfram að vinna að þessari stóru plötu sem ég er með í bígerð. Þá langar mig líka að gefa út fleiri lög í svipuðum stíl og Villt fræ, þar sem fókusinn verður á íslenska textagerð.

Hvernig er framtíðin hjá Vio?

Við vorum að fá breiðskífu í hendurnar, rjúkandi heita beint úr masteringu/marineringu, fyrir nokkrum dögum síðan og erum byrjaðir að skipuleggja útgáfuna og næstu skref. Platan hefur eiginlega verið í smíðum í fimm ár og er einungis önnur breiðskífan okkar, þannig þetta er gríðarlega stór áfangi. 

„Fólk getur byrjað að undirbúa sig fyrir nýtt lag á næstunni og almennar flugeldasýningar á þeim vígvelli.“