Fótbolti

Sú marka­hæsta ó­vænt til Mexíkó og ekki með á EM

Runólfur Trausti Þórhallsson skrifar
Jennifer Hermoso fagnar marki með Spáni í apríl á þessu ári. Hún mun ekki geta fagnað á EM þar sem hún missir af mótinu vegna meiðsla.
Jennifer Hermoso fagnar marki með Spáni í apríl á þessu ári. Hún mun ekki geta fagnað á EM þar sem hún missir af mótinu vegna meiðsla. EPA-EFE/MARK RUNNACLES

Spænska landsliðið hefur orðið fyrir miklu höggi í aðdraganda Evrópumótsins sem fram fer í Englandi í júlí. Stórstjarnan Jennifer Hermoso verður ekki með liðinu á mótinu og það sem meira er, hún yfirgefur stórlið Barcelona fyrir lið í Mexíkó.

Barcelona og hin 32 ára gamla Hermoso hafa átt góðu gengi að fagna undanfarin tvö ár. Liðið hafði verið nær óstöðvandi þangað til það lá gegn Lyon í úrslitum Meistaradeildar Evrópu. Börsungar geta þó ekki kvartað yfir framlagi Hermoso en hún er markahæsti leikmaður í sögu félagsins með 174 mörk.

Hermoso lék með Barcelona frá 2013 til 2017 og svo aftur frá 2019 til 2022. Varð hún fimm sinnum spænskur meistari, fjórum sinnum bikarmeistari og einu sinni Evrópumeistari með félaginu. Það vekur því töluverða athygli að hún hafi samið við Pachuca í Mexíkó en frá þessu greindi félagið í vikunni.

Ofan á að vera markahæsti leikmaður í sögu Barcelona er Hermoso líka markahæsti leikmaður í sögu Spánar með 45 mörk í 91 leik. Hún mun hins vegar ekki geta bætt við mörkum á Evrópumótinu í sumar vegna meiðsla á hné.

Hún meiddi liðbönd í hægra hné og verður frá keppni næstu vikurnar. Mun hún því einnig missa af byrjun Liga MX Femenil-deildarinnar í Mexíkó sem hefst 12. júlí næstkomandi.

Spánn er í B-riðli á EM ásamt Danmörku, Finnlandi og Þýskalandi. 

Fótbolti EM 2022 í Englandi Mexíkó

Mest lesið


Fleiri fréttir

Sjá meira


×

Mest lesið