Fótbolti

Mætir Arnari 23 árum eftir að hann mætti honum inni á vellinum

Ingvi Þór Sæmundsson skrifar
Ildefons Lima í baráttu við Jóhann Berg Guðmundsson í leik Andorra og Íslands í undankeppni EM vorið 2019. Þótt Jóhann Berg sé kominn á fertugsaldurinn var hann enn í 7. flokki þegar Lima lék sinn fyrsta A-landsleik. Lima er enn að og verður í eldlínunni í Víkinni í kvöld.
Ildefons Lima í baráttu við Jóhann Berg Guðmundsson í leik Andorra og Íslands í undankeppni EM vorið 2019. Þótt Jóhann Berg sé kominn á fertugsaldurinn var hann enn í 7. flokki þegar Lima lék sinn fyrsta A-landsleik. Lima er enn að og verður í eldlínunni í Víkinni í kvöld. getty/Quality Sport Images

Íslands- og bikarmeistarar Víkings mæta Inter Club d'Escaldes frá Andorra í úrslitaleik um sæti í 1. umferð forkeppni Meistaradeildar Evrópu í Víkinni í kvöld. Í liði gestanna er einn allra reyndasti fótboltamaður heims.

Meistaradeild Evrópu tímabilið 2022-23 hófst í Víkinni á þriðjudaginn. Inter Club d'Escaldes vann þá La Fiorita frá San Marinó, 2-1, á meðan Víkingur rústaði Levadia Tallin frá Eistlandi, 6-1.

Miðað við leikina tvo á þriðjudaginn eru Víkingar mörgum ljósárum á undan Inter í getu og allt nema stórsigur Íslands- og bikarmeistaranna í kvöld yrði að teljast óvænt.

En hver svo sem úrslit leiksins í kvöld verða ætla leikmenn Inter allavega að njóta dvalarinnar í Reykjavík til hins ítrasta. Í gær sást til þeirra á hlaupahjólum á Austurvelli og þá skoðuðu þeir Hallgrímskirkju.

Þekktasti leikmaður Inter er Ildefons Lima. Óhætt er að kalla hann reynslubolta en Lima er nefnilega á 43. aldursári og hefur spilað í meistaraflokki síðan 1997. Þá voru margir samherja hans ekki fæddir.

Lima, sem fæddist 10. desember 1979 í Barcelona, er leikja- og markahæstur í sögu landsliðs Andorra með 134 leiki og ellefu mörk, þrátt fyrir að vera miðvörður. Hann lék sinn fyrsta landsleik 22. júní 1997. Lima er aðeins annar tveggja evrópskra leikmanna sem hafa leikið landsleik á fjórum mismunandi áratugum. Hinn er Finninn Jari Litmanen.

Lima rífur kjaft við Joleon Lescott í leik Englands og Andorra á Wembley sumarið 2009.getty/Phil Cole

Þegar Lima var enn ungur mætti hann Íslandi í undankeppni EM 2000. Hann var í byrjunarliði Andorra í fyrri leik liðanna 27. mars 1999. Ísland vann leikinn með tveimur mörkum gegn engu.

Í byrjunarliði Íslands var Arnar Gunnlaugsson, þjálfari Víkings. Leiðir þeirra liggja nú aftur saman, 23 árum seinna, þótt hlutverkin séu ólík. Arnar er á hliðarlínunni en Lima enn að spila.

Arnar Gunnlaugsson endurnýjar kynnin við Lima í kvöld.vísir/Hulda Margrét

Lima lék ekki seinni leik Íslands og Andorra í undankeppni EM 2000 sem Íslendingar unnu 3-0. Hann hefur þó mætt Íslandi þrisvar sinnum síðan, í vináttulandsleik 2002 og svo í tveimur leikjum í undankeppni EM 2020.

Í marki Íslands í leikjunum gegn Andorra 2019 stóð Hannes Þór Halldórsson, nýjasti leikmaður Víkings. Þeir Lima hittust í Víkinni fyrr í vikunni og hinn síungi Lima birti mynd af þeim saman á Twitter.

Sigurvegarinn í leik Víkings og Inter mætir Malmö í 1. umferð forkeppni Meistaradeildarinnar í næsta mánuði. Þjálfari Malmö er Víkingum vel kunnur; Milos Milojevic, fyrrverandi leikmaður og þjálfari þeirra rauðsvörtu.

Leikur Víkings og Inter hefst klukkan 19:30 og verður sýndur beint á Stöð 2 Sport.

Meistaradeild Evrópu í fótbolta karla Víkingur Reykjavík Andorra

Mest lesið


Fleiri fréttir

Sjá meira


×

Mest lesið