Umfjöllun: Stelpurnar okkar sluppu með stigið en tóku sögulegt skref

Íslenska liðið skoraði strax í upphafi leiks en náði ekki að fylgja því eftir. Stórleikur Söndru Sigurðardóttur í markinu og vökul augu miðvarðanna Glódísar Perlu Viggósdóttur og Guðrúnar Arnardóttur áttu mestan þátt í því að íslensku stelpurnar tókst að hanga á stiginu en fleiri ítölsk mörk lágu lengi í loftinu.

Þetta eru samt söguleg úrslit fyrir liðið því íslenska kvennalandsliðið hefur aldrei áður náð í stig í tveimur leikjum í röð á Evrópumóti og þær eiga enn möguleika á sæti í átta liða úrslitunum.

Nú liggur aftur á móti á borðinu að líklega dugar þá ekkert annað en sigur á móti sterku liði Frakka þó að stigi gæti verið nóg verði önnur úrslit hagstæð.

Liðið er enn taplaust og hefur skorað í báðum sínum leiknum sem er jákvætt. Vandræði liðsins í þessum leik á móti Ítölum fylla mann áhyggjum um hvort að liðið hafi burði til að ná í eitthvað á móti Frökkum.

Miðjan virkaði þreytuleg

Miðjan virkaði lengstum þreytuleg og stelpurnar náðu ekki að vinna stöðurnar sína eins og þær gerðu svo vel á móti Belgum. Ítalir voru miklu meira með boltann, miklu beinskeyttari og miklu hættulegri. Þær eru hins vegar með stigi minna en þær íslensku eftir fyrstu tvo leikina en fá annað gott tækifæri til að bæta sína stöðu á móti Belgum í lokaumferðinni.

Það var eitthvað búið að kvarta yfir því að föstu leikatriðin hafi ekki verið að skila liðinu mörkum í síðustu leikjum. Stelpurnar voru fljótar að svara þeirri gagnrýni með því að skora eftir innkast eftir innan við þrjár mínútur. Boltinn barst þá út til Karólínu Leu Vilhjálmsdóttur sem afgreiddi boltann upp í bláhornið með óverjandi skoti. Frábært mark og algjör draumabyrjun.

Lentu í vandræðum eftir markið

Það vantaði auðvitað ekkert til að kveikja á íslenska stuðningsfólkinu sem fagnaði markinu gríðarlega eins og stelpurnar okkar inn á vellinum. Í stað þess að halda áfram og ná tökum á leiknum lentu stelpurnar okkar fljótlega í vandræðum.

Ítalir höfðu fengið áfall í byrjun leiks gegn Frökkum og brotnuðu þá. Nú náðu þær aftur á móti að halda velli og vinna sig fljótt inn í leikinn.

Þær ítölsku unnu sig út úr þessu áfalli með ágætum kafla en þau skot sem sluppu að íslenska markinu voru sem betur fer ekki sannfærandi. Ítalski þjálfarinn skipti út tveimur sóknarmönnum sínum og sá kannski eftir því þegar fá skotanna þeirra hittu markið. Sandra var vel á verði þegar þau hittu markið.

Gekk illa að halda boltanum

Íslenska liðið hafði byrjað vel með að skora mark en gekk illa að halda bolta og spila í gegnum miðjuna. Miðjumennirnir oftast út úr stöðum, ákefðin mikil en vantaði aðeins upp á skírari sýn á uppbyggingu sóknanna.

Sveindís Jane Jónsdóttur gekk illa að komast í boltann fram eftir leik sem var kannski ekki oft henni að kenna því meðspilarar hennar buðu upp á allt of margar slakar sendingar fram á hana.

Undir lok hálfleiksins var orðið nauðsynlegt að setjast yfir málin og endurskipuleggja liðið. Ítalir voru allt of mikið með boltann (59%) og jöfnunarmarkið var farið að liggja í loftinu ef ekkert breyttist. Stelpurnar héldu út og gátu rætt aðeins málin í hálfleik.

Ítölsku stelpurnar vildu greinilega ekki kólna niður eftir flottan endi á fyrri hálfleik og voru komnar snemma inn á völlinn eftir hálfleiksræðuna.

Ítalski þjálfarinn var einnig fljót að setja sóknarstjörnur liðsins inn í seinni hálfleik, þær sömu sem hún hafði sett á bekkinn eftir skellinn á móti Frökkum.

Það var þó varamaður íslenska liðsins, Alexandra Jóhannsdóttir, sem fyrr að fá færi en hún hitti ekki markið.

Skömmu síðar voru Ítalir búnir að jafna með laglegu marki frá Valentinu Bergamaschi eftir frábæran undirbúning Barböru Bonansea sem hafði komið inn á í hálfleik.

Áttu inni fyrir markinu

Ítalska liðið átti vel inni fyrir þessu marki en nú þurfti eitthvað meira líf í íslenska liðið. Sveindís Jane var komin upp á topp en gekk áfram illa að komast í boltann og í sína kjörstöðu.

Ítalir ógnuðu áfram, Sandra varði vel og svo hafði hún heppnina með sér þegar hún hálfvarði boltann í stöngina. Sókn Ítala þyngdist og hvert færið á fætur öðru leit dagsins ljós. Þessi leikur gat eiginlega ekki endað nema á einn hátt.

Íslensku stelpurnar börðust samt fyrir hverjum bolta á erfiðum lokakafla leiksins reyndu að halda út. Hver sókn var ákveðinn léttir á liðinu en því miður voru þær of fáar og of stuttar til að skila einhverju sem hefði getað gefið okkar konum sigurmark. Ítalir fóru að taka meiri áhættu og það opnaði möguleika.

Skyndisóknir hefðu getað breytt öllu

Frábær sókn undir lokin kom Karólínu Leu i dauðafæri en eins og hún hitti hann vel í fyrri hálfleik þá hitti hún hann skelfilega þarna.

Önnur lagleg skyndisókn kom Sveindísi næstum því í færi en það var ljóst að Ítalir lögðu nú ofurkapp á ná í sitt nauðsynlega sigurmark.

Íslensku stelpurnar fengu ekki á sig sigurmark sem var gleðiefni miðað við það sem stefndi í en nú er að finna leiðir til að gera eitthvað á móti gríðarlega sterku frönsku liði á mánudaginn kemur.