Ökumaðurinn lést í slysinu við Hvalfjarðargöng

Ásmundur Kristinn Ásmundsson, settur lögreglustjóri á Vesturlandi, staðfestir þetta í samtali við Vísi. Hann segir lögreglu hafa fengið tilkynningu um rásandi aksturslag á bifreið sem var á leið í Hvalfjarðargöngin. Lögreglumenn mættu bílnum á Akrafjallsvegi, þar sem bíllinn keyrði í átt að Akranesi, og ætluðu sér að snúa við til að kanna ástand ökumanns og réttindi.

„Þegar þeir snúa við, sjá þeir að bíllinn hefur aukið hraðann verulega. Þeir keyra í átt að ökumanni en að sögn vitna keyrði hann fram úr strætisvagni og vitni í strætisvagninum segja að bíllinn hafi verið í ógnarhraða. Þegar hann fer framhjá strætisvagninum virðist hann missa stjórn á bílnum og endar utan vegar.“

Lögreglumenn hafi hins vegar ekki séð bílveltuna þar sem þeir hafi verið svo langt frá bílnum. Ökumaðurinn hafi verið einn í bílnum en að öðru leyti segir Ásmundur að ekki sé vitað hve hratt maðurinn ók, né hvort hann hafi verið undir áhrifum vímuefna. 

„Málið er í rannsókn en við getum staðfest að maðurinn lést.“

Þá hafa allir farþegar strætisvagnsins hlotið áfallahjálp á sjúkrahúsinu á Akranesi.

Lögreglan sendi frá sér tilkynningu fyrir skömmu vegna málsins.