Arsenal vann afar sannfærandi 0-3 útisigur er liðið heimsótti Bournemouth í ensku úrvalsdeildinni í knattspyrnu í dag. Sigurinn lyftir liðinu í það minnsta tímabundið á topp deildarinnar.
Það er óhætt að segja að yfirburðir Arsenal hafi verið miklir í dag. Liðið byrjaði af miklum krafti og Norðmaðurinn Martin Ødegaard kom liðinu í forystu eftir aðeins fimm mínútna leik.
Ødegaard var svo aftur á ferðinni á 11. mínútu leiksins þegar hann tvöfaldaði forystu gestanna eftir stoðsendingu frá nýja framherjanum Gabriel Jesus og staðan var því 0-2 þegar flautað var til hálfleiks.
Yfirburðir Arsenal héldu áfram í síðari hálfleik og William Saliba skoraði þriðja mark gestanna á 54. mínútu með fallegu skoti eftir sendingu frá Granit Xhaka.
Gabriel Jesus skoraði svo fjórða mark Arsenal á 72. mínútu, en eftir langa skoðun myndbandsdómara kom í ljós að Brassinn var hársbreidd fyrir innan varnarlínu Bournemouth og rangstaða dæmd.
Niðurstaðan varð því öruggur 0-3 sigur Arsenal og liðið er enn með fullt hús stiga eftir þrjár umferðir. Arsenal trónir nú á toppi deildarinnar með níu stig, en Bournemouth hefur aðeins fengið þrjú.
