50 laxa dagar í Eystri Rangá

Eystri Rangá getur verið að fá göngur langt inn í október og stundum lengur. Þetta gerir það að verkum að veiðimenn sem veiða síðsumars eru reglulega að fá nýgengna laxa í bland við legna. Áin hefur verið að fá góðar göngur í sumar og eru helstu staðir í ánni vel setnir af laxi. 

Þar má nefna Strandsíki, Dýjanes, Bátsvað, Drápubakka og Rangárvaðið en þar liggur lax frá útfalli við sleppitjörn og niður næstu 150 metrana í það minnsta. Sama með Drápubakka. Þar var sett niður ný tjörn og árangurinn af henni sést vel enda er mikið af laxi á breiðunni fyrir neðan tjörnina. Í fyrradag komu 54 laxar á land og gærdagurinn ekki síðri en áin er í frábæru vatni eins og yfirleitt nema að því viðbættu að hún er tær og þess vegna reglulega gaman að nota hefðbundnar litlar flugur við veiðar. Stærðir 12-14# hafa til dæmis verið að virka miklu betur heldur en túpurnar sem veiðimenn nota venjulega þarna en það breytist auðvitað ef hún litast.

Það er eingöngu veitt á flugu þessa dagana þegar vikan er að skila um það bil 250-300 löxum en það á eftir að breytast ansi mikið þegar maðkurinn fer í ánna 1. september. Miðað við magn af laxi í Eystri þá reikna vanir menn að fyrsta vikan í maðki gæti skilað 500-600 löxum ef skilyrðin verða góð.