Innlent

Innanlandsvélar Icelandair gætu verið knúnar vetni eftir þrjú ár

Kristján Már Unnarsson skrifar
Flugvélar Icelandair í innanlandsfluginu eru af gerðinni Dash 8.
Flugvélar Icelandair í innanlandsfluginu eru af gerðinni Dash 8. Vilhelm Gunnarsson

Tækni til að umbreyta olíuknúnum innanlandsflota Icelandair í vetnisknúnar flugvélar verður tilbúin eftir þrjú ár. Þetta kom fram á fundi um orkuskipti í flugi á Reykjavik Edition hótelinu í dag í tengslum við Hringborð norðurslóða.

Icelandair, Isavia, Landsvirkjun og Samtök ferðaþjónustunnar stóðu fyrir málstofunni, sem fjallað var um í fréttum Stöðvar 2. Meðal framsögumanna var fulltrúi bandaríska fyrirtækisins Universal Hydrogen, sem vinnur að tiltölulega fljótlegri leið til orkuskipta. Í stað þess að þróa og smíða nýja flugvél frá grunni hyggst það umbreyta flugvélum sem þegar eru í notkun.

Rod Williams frá Universal Hydrogen lýsir því hvernig fyrirtækið hyggst umbreyta skrúfuþotum svo þær brenni vetni í stað jarðefnaeldsneytis.Bjarni Einarsson

„Við erum í fyrsta lagi að þróa endurbótapakka fyrir skrúfuþotur sem eru í notkun núna, eins og Dash-8 vélarnar sem Icelandair notar innanlands. Þessi endurbótapakki gerir okkur kleift að breyta flugvélum þannig að þær séu knúnar með vetni í staðinn fyrir jarðefnaeldsneyti eins og núna,“ segir Rod Williams, viðskiptastjóri Universal Hydrogen.

Jafnframt gengur hugmyndin út á það að í stað þess að dæla vetni á eldsneytisgeyma í flugvélinni verður skipt um vetnishylki eftir hverja flugferð.

Svona hyggst bandaríska fyrirtækið Universal Hydrogen koma vetnishylkjum fyrir í afturhluta Dash 8-flugvéla.Universal Hydrogen

„Hylkin eru einfaldlega fjarlægð og ný hylki sett í staðinn þegar á að fara í annað flug,“ segir Rod Williams.

Hann telur Ísland ákjósanlegan vettvang fyrir slík orkuskipti.

„Á heimsvísu held ég að Ísland sé einn af eftirsóknarverðustu stöðunum vegna mikils framboðs á grænu rafmagni og grænum orkugjöfum í landinu.“

Eftir lendingu eru ný fullhlaðin vetnishylki sett í vélina í stað þeirra sem búið er að nota.Universal Hydrogen

Og það gæti verið stutt í byltinguna með þessari aðferð.

„Við áætlum að þróun flugvélarinnar verði lokið og hún verði vottuð árið 2025 og þá getum við afhent fyrstu flugvélina innan þess tímaramma,“ segir talsmaður Universal Hydrogen.

Hér má sjá frétt Stöðvar 2:

Fréttir af flugi Orkuskipti Orkumál Icelandair Hringborð norðurslóða Loftslagsmál

Tengdar fréttir

Spáð að þessi verði fyrsta rafknúna farþegaflugvélin

Þegar rafmagnsflugvélin Alice hóf sig til flugs fyrir tólf dögum frá Grant County-alþjóðaflugvellinum í Washington-ríki í Bandaríkjunum sagði CNN-fréttastofan að hún væri fyrsta farþegaflugvél heims, sem alfarið væri rafknúin, til að taka flugið. Þetta fyrsta reynsluflug hennar varði í átta mínútur og fór hún í 3.500 feta hæð.

Viljayfirlýsing Icelandair gerir ráð fyrir fimm rafknúnum flugvélum

Icelandair gerir ráð fyrir að fá fimm rafmagnsflugvélar í innanlandsflugið í viljayfirlýsingu, sem félagið skrifaði undir í síðustu viku. Ráðamenn Icelandair telja raunhæft að orkuskiptin í farþegafluginu hefjist fyrir lok þessa áratugar.

Ná samkomulagi um fjárfestingu í vetnisframleiðslu fyrir um 20 milljarða

HS Orka og alþjóðlega orkufyrirtækið Hydrogen Ventures Limited (H2V) hafa náð samkomulagi um orkuverð og aðra skilmála vegna fyrirhugaðrar vetnisframleiðslu á Íslandi sem verður nýtt við framleiðslu metanóls í Auðlindagarði HS Orku. Áætluð fjárfesting er um 150 milljónir evra, jafnvirði um 21 milljarður íslenskra króna.

Flugvélin sem gæti orðið sú fyrsta rafknúna hjá Icelandair

Ráðamenn Icelandair telja að vetnis- og rafmagnsflugvélar geti orðið raunhæfur kostur í innanlandsfluginu á fáum árum og hafa skrifað undir tvær viljayfirlýsingar við erlend fyrirtæki með það að markmiði að verða á meðal fyrstu flugfélaga heims til að gera innanlandsflug kolefnislaust.

Kynna rafknúnar vetnisvélar sem leið til orkuskipta í flugi

Dash 8-flugvélum, eins og þeim sem notaðar eru hérlendis í innanlandsfluginu, verður hægt að fljúga á mengunarlausu vetni eftir fjögur ár í stað flugvélabensíns, nái áform bandarísks fyrirtækis fram að ganga. Flugvélaframleiðendur horfa nú til vetnis sem milliorkugjafa fyrir rafknúnar flugvélar.

Mest lesið


Fleiri fréttir

Sjá meira


×

Mest lesið