Hilary og Aaron byrjuðu fyrst saman árið 2001 og áttu svo í slitróttu sambandi til ársins 2004. Voru þau sannkallað stjörnupar, enda tvær af stærstu unglingastjörnum þess tíma. Þá vakti sambandið sérstaka athygli eftir að Aaron kom fram í þætti af Lizzie McGuire, þar sem Hilary fór með aðalhlutverk.
Ástin sem hann missti frá sér
Aaron hafði glímt við mikinn fíknivanda áður en hann fannst látinn í baðkari á heimili sínu á laugardaginn.
Í gegnum tíðina hafði hann reglulega minnst á Hilary í viðtölum og talað um hana sem ástina sem hann missti frá sér. Þá sagðist hann vera staðráðinn í því að koma sér inn á beinu brautina og vinna Hilary til baka - svo varð þó aldrei.
„Þú bjóst yfir sjarma sem var engu líkur... Ó hvað ég elskaði þig heitt á okkar unglingsárum,“ skrifaði Hilary á Instagram síðu sinni um leið og hún sendi ást til fjölskyldu hans.
Á fjölmargar minningar með Aaroni
Hilary var ekki eina unglingastjarnan sem Aaron átti í ástarsambandi við, því hann var einnig í sambandi með leikkonunni Lindsay Lohan um skeið.
Lindsay minntist Aarons í viðtali við Access Hollywood. Þar talaði hún um þær fjölmörgu minningar sem hún á með honum. Hún sagðist þó ekki hafa heyrt í Aaroni í langan tíma. Þá sendi hún samúðarkveðjur til fjölskyldu hans.
Fíknin og andlegu veikindin eini óvinurinn
Bróðir Aarons er Nick Carter, meðlimur hljómsveitarinnar The Backstreet Boys. Hljómsveitin var á tónleikaferðalagi þegar fregnir af andláti Aarons bárust.
Bræðurnir höfðu átt í stormasömu sambandi síðustu ár og hafði Nick meðal annars fengið nálgunarbann á Aaron, eftir að Aaron hafði hótað óléttri eiginkonu hans lífláti.
„Þrátt fyrir að samband okkar hafi verið fólkið, hefur ást mín á honum aldrei dofnað. Ég hef alltaf haldið í þá von að hann myndi á endanum finna löngun til þess að komast inn á beinu brautina og leita sér þeirrar hjálpar sem hann þurfti svo mikið á að halda,“ skrifaði Nick á Instagram á sunnudaginn.
„Stundum vill maður kenna einhverjum um missi. Sannleikurinn er hins vegar sá að fíknin og andlegu veikindin eru eini raunverulegi óvinurinn í þessu tilfelli.“
Backstreet Boys minntust Aarons á tónleikum
Á sunnudaginn héldu Backstreet Boys tónleika á O2 leikvanginum í London. Nýttu þeir tækifærið til þess að heiðra minningu Aarons.
„Í kvöld erum við sorgmæddir, því við misstum einn úr fjölskyldunni okkar í gær,“ sagði Backstreet Boys meðlimurinn Kevin Richardson.
Myndskeið frá tónleikunum hefur gengið um netið þar sem má sjá Nick Carter í miklu uppnámi. Hljómsveitin flutti lagið Breathe og tileinkuðu þeir lagið Aaroni.
