Braut tennurnar í Brynjari Björns fyrir níu árum og er nú mættur aftur á Klakann

Grindavík hefur í staðinn samið við leikstjórnandann Damier Erik Pitts en hann er 32 ára og 177 sentimetrar á hæð.

Nýi leikmaður Grindavíkurliðsins þekkir það að spila í íslensku deildinni en það gerði hann með góðum árangri fyrir níu árum síðan.

Pitts hóf atvinnumannaferil sinn á Íslandi eftir að hafa klára háskólaferillinn með Marshall skólanum vorið 2012.

Pitts samdi við KFÍ og spilaði með liðinu tímabilið 2012-13. Hann var með 33,5 stig, 7,0 stoðsendingar og 6,1 frákast að meðaltali í leik. Pitts var mjög duglegur að koma sér á vítalínuna en hann tók 11,8 víti að meðaltali í leik. Pitts var stigahæsti leikmaður íslensku deildarinnar þetta tímabil.

Einn sem ætti að kannast vel við Pitts er KR-ingurinn Brynjar Þór Björnsson því Pitts braut tennurnar í honum í leik KFÍ og KR þetta tímabil. Brynjar man örugglega vel eftir þeirra samskiptum enn þá en Brynjar spilar ekki lengur í deildinni heldur er einn af sérfræðingunum í Subway Körfuboltakvöldi.

KFÍ tryggði einmitt sæti sitt í deildinni umræddan vetur með sigri á KR á Ísafirði í mars þar sem Pitts skoraði 33 stig og fór tuttugu sinnum á vítalínuna.

Pitts var bara í eitt ár á Íslandi en hann fór til Tyrklands veturinn eftir og hefur síðan spilað á Ítalíu, í Lettlandi, í Finnlandi, í Portúgal, í Ungverjalandi og í Norður Makedóníu.

Það verður fróðlegt að sjá hvort stigakóngur úrvalsdeildarinnar fyrir níu árum skili áfram svipuðum tölum næstum því áratug síðar.

David Azore hefur spilað sinn síðasta leik með Grindavíkurliðinu en hann var með 20,8 stig og 1,8 stoðsendingu að meðaltali í leik.