Vin á Hverfisgötu heyrir sögunni til

Um er að ræða eina af 92 tillögum meirihlutans í borginni til að skera niður vegna hallareksturs. Tillagan hljóðaði svona:

„Lagt er til að Vin dagsetur verði lagt af en markhópi þjónustunnar mætt með öðru móti á félagsmiðstöðvum borgarinnar.“

Velferðarsvið Reykjavíkurborgar tók við rekstri Vin dagseturs í júlí 2022 en Rauði krossinn á höfuðborgarsvæðinu hafði rekið það áður með samningi við Reykjavíkurborg. Rauði krossinn ákvað að hætta rekstrinum og nú hefur Reykjavíkurborg ákveðið það sama.

Helsta hlutverk Vinjar er að draga úr félagslegri einangrun og skapa vinalegt umhverfi fyrir gesti setursins.

Í tillögu meirihlutans segir að þjónusta til að koma til móts við félagsstarf fólks með geðraskanir verði útfært í samráði við Geðhjálp.

Fjölmargir hafa gagnrýnt niðurskurðaraðgerðina. Þeirra á meðal er Þórir Guðmundsson, fyrrverandi forstöðumaður Rauða krossins í Reykjavík.

„Bráðnauðsynlegt dagsetur“

„Rúmlega ári eftir að Reykjavíkurborg tók við lyklavöldum í Vin á nú að loka henni. Á mínum tíma hjá Rauða krossinum þurfti oft að berjast fyrir tilvist Vinjar, sem er bráðnauðsynlegt dagsetur fyrir fólk með geðraskanir. Þar hafa tugir manna athvarf á daginn, félagsskap og stuðning,“ segir Þórir í færslu á Facebook.

„Allir sem hafa kynnst starfsemi Vinjar skynja hver sérstaða hennar er. Það fólk sem nýtur Vinjar er ekki líklegt til að skrifa greinar eða ýta á stjórnmálamenn. Á meðan þeir keppast í borggarráði um að skera meira niður sér fólk, sem getur illa varið sig, fram á dramatískar breytingar á sínu lífi til hins verra.“

Undir þetta tekur Sirrý Arnardóttir fjölmiðlakona.

„Við þykjumst vera að auka skilning og umburðarlyndi gagnvart geðröskunum í samfélaginu og þá á að loka VIN. Nei takk! Ekki þessa forgangsröðun. Félagsleg einangrun er lífshættuleg. VIN vinnur gegn félagslegri einangrun.“

Blásið í herlúðra fyrir sautján mánuðum

Reykjavíkurborg tók við rekstri Vinjar í júlí 2021. Í tilkynningu á vef borgarinnar við þau tímamót kom fram að eftir sem áður yrði helsta hlutverk Vinjar að draga úr félagslegri einangrun og skapa vinalegt umhverfi fyrir gesti setursins.

„Það var létt yfir fólki þegar fulltrúar Rauða krossins annars vegar og Reykjavíkurborgar hins vegar hittu stjórnendur og nokkra gesti Vinjar í dagsetrinu fyrr í dag. Tilefnið voru formleg lyklaskipti en eftir nær 29 ár færist nú starfsemin þar frá Rauða krossinum yfir til Reykjavíkurborgar. Það var Halldóra Pálsdóttir, forstöðumaður Vinjar, sem afhenti Regínu Ásvaldsdóttir, sviðsstjóra velferðarsviðs, formlega lyklavöldin. Hún bauð velferðarsvið velkomið um leið og hún kvaddi Rauða krossinn, þakkaði fyrir samfylgdina og sagði frá anda starfseminnar, sem einkennist öðru fremur af mannvirðingu og vináttu. Einn af fastagestum og hollvinum dagsetursins, Garðar Sölvi Helgason, var meðal viðstaddra en gestir fengu að gjöf bók Ívars Rafns Jónssonar, „Glímt við geðklofa“, sem er reynslusaga Garðars Sölva,“ segir í tilkynningunni fyrir sautján mánuðum.

„Yfir hundrað einstaklingar heimsækja Vin reglulega. Þar er lögð áhersla á fræðslu- og batamiðuð verkefni til að efla virkni gesta, með tilliti til þarfa og áhuga hvers og eins. Þar er meðal annars starfrækt ferðafélagið Víðsýn og Vinaskákfélag. Þar er einnig listasmiðja, haldnir fundir og margt fleira.“

Marín Þórsdóttir, forstöðumaður Rauða krossins á höfuðborgarsvæðinu, sagði við það tilefni það ljúfsára stund að kveðja Vin. Hún sagðist finna fyrir miklum metnaði frá Reykjavíkurborg varðandi reksturinn.

„Þetta eru blendnar tilfinningar. Við höfum verið með Vin í næstum 29 ár og það hefur gengið ótrúlega vel en á sama tíma er líka gott að vita til þess að Reykjavíkurborg taki við starfseminni. Við finnum að þar er mikill metnaður fyrir hönd gesta Vinjar og það er það sem skiptir mestu máli. Vin hefur svo sannarlega verið vin fyrir þennan hóp og allt útlit fyrir að svo verði áfram,“ segir hún.

Átti að efla starfið

Fram kom að Þjónustumiðstöð Vesturbæjar, Miðborgar og Hlíða myndi framvegis sjá um rekstur Vinjar. Sigþrúður Erla Arnardóttir, framkvæmdastjóri þjónustumiðstöðvarinnar, sagðist sjá spennandi tíma framundan. 

„Við erum að taka við mjög góðu starfi og það skiptir öllu máli. Við erum spennt fyrir þessu verkefni. Við ætlum að læra af því starfi sem hefur verið hér og tökum svo eitt skref í einu í átt að því að efla það enn frekar.“

Skrefin í átt að eflingu verða ekki fleiri því nú er ljóst að rekstrinum verður hætt.