Tekist á um nærbuxnaatriði og nektardans Lenoncie í héraði

Jakob Bjarnar skrifar 17. janúar 2023 15:19

Frægt nærbuxnaatriði Leoncie var meðal þess sem var til umfjöllunar í héraðsdómi Reykjavíkur í meiðyrðamáli söngkonunnar á hendur eiganda Glatkistunnar. skáskot timarit.is

Héraðsdómur Reykjavíkur sýknaði Helga Jónsson, eiganda og umsjónarmann Glatkistunnar, í meiðyrðamáli söngkonunnar Leoncie Indiu Martin. Henni hefur verið gert að greiða Helga 1,4 milljón í málskostnað.

Leoncie gerði alvarlegar athugasemdir við texta sem birtist um hana á Glatkistunni en þar er haldið utan um feril íslenskra tónlistarmanna. Hún krafðist þess að eftifarandi ummæli yrðu dæmd dauð og ómerk:

1. „Næstu árin starfaði Leoncie við nektardans og söng með hléum en dvaldi þess á milli erlendis um lengri og skemmri tíma en var alkomin til Íslands 1990, uppúr því sem hún fór aftur að láta að sér kveða á tónlistarsviðinu.“

2. „Í ársbyrjun 1994 sýndi Ríkissjónvarpið þátt um Leoncie þar sem ferli hennar í máli og myndum var gerð skil, það sem olli þó mesta umtalinu var bútur sem ekki var í myndinni (sem klipptur hafði verið út af beiðni Sveinbjörns I. Baldvinssonar þáverandi dagskrárstjóra) en þar klæddi söngkonan sig í nærbuxur merktar Alþýðuflokknum sem Jón Baldvin Hannibalsson þáverandi utanríkisráðherra, hafði fært henni á einhverri skemmtun á Suðurnesjum.“

3. „Þetta ár birtust fréttir þess efnis að Leoncie hefði landað stórum þriggja ára útgáfusamningi á Indlandi en líklega áttu þær fréttir aldrei við nein rök að styðjast.“

4. „Næstu árin átti Leoncie eftir að leggja meiri áherslu á tónlistarferil sinn en áður, hún var hætt að strippa og plötur komu nú út tíðar en áður, 2002 kom næsta plata en hún bar titilinn Sexy loverboy. Tímaritið Sánd gaf plötunni frábæra dóma en miðað við það sem á undan hafði gengið er erfitt að lesa í raunverulega merkingu þess dóms.“

Heiðarleg, guðrækin og sómakær og vill ekki láta kenna sig við nektardans

Leoncie krafðist tveggja milljóna króna í miskabætur með vöxtum. Í reifun segir að Leoncie líti á ofangreind ummæli sem ærumeiðandi aðdróttanir sem eigi ekki við rök að styðjast; gróf árás á æru stefnanda og starfsheiður. Ummælin séu röng og aðdróttanir alvarlegar þar sem nektardans er talinn siðferðilega ámælisverður.

Verjandi hennar, Ómar R. Valdimarsson, sagði að skjólstæðingur sinn væri heiðarleg, sómakær og guðrækin kona sem kærði sig ekki um að vera kennd við nektardans. Og því síður geti hún fellt sig við að vera vænd um að koma fram á nærbuxum merktum Alþýðuflokknum einum fata. Segir í dómi að þetta hafi valdið stefnanda vanlíðan svo mikilli að hún þurfti að leita til sálfræðings vegna þessa.

„Stefnandi vísar til þess að það sé sérstaklega meiðandi að ummælin hafi verið sett fram á internetinu, en hún njóti mikillar virðingar samferðarmanna sinna í tónlistinni.“

Gömul viðtöl verða Leoncie að falli

Lögmaður Helga, Álaug Lára Lárusdóttir, vísaði til tjáningarfrelsisákvæða auk þess sem lögð voru fram ýmis göng, ýmis viðtöl við Leoncie þar sem hún talaði um nektardans sinn. Til að mynda segir hún í tímaritinu Eintaki 27. janúar 1994 við spurningunni hvort hún sé enn að fækka fötum fyrir Íslendinga: „Aðeins í einkasamkvæmum. Ég fer ekki á opinbera skemmtistaði vegna þess að ég vil ekki sýna líkama minn fyrir nokkrar krónur og mér er alveg sama hverjir koma frá Danmörku og dansa fyrir tvö, þrjú þúsund krónur. Ég vil fá hæstu borgun vegna þess að ég hugsa í milljónum ekki þúsundum.“

Héraðsdómur Reykjavíkur en Leoncie fór bónleið til búðar eftir að hafa rekið meiðyrðamál sitt á hendur Glatkistunni þar.vísir/vilhelm

Vísað er í margvíslega umfjöllun og auglýsingar þar sem Leoncie sé teiknuð upp sem frumkvöðull á sviði nektardans á Íslandi. Í raun sé öll umfjöllunin um Leoncie byggð á því sem fram hefur komið opinberlega og finna megi á tímarit.is. Stefnandi tekur fram að þau ummæli sem krafist sé ómerkingar á, séu ekki röng. Til að mynda hvað varði téðar nærbuxur þá lýsi Leoncie því sjálf í Pressunni 3. febrúar 1994 á þennan hátt:

„Mér var sagt að ríkissjónvarpið hafi hringt í Jón Baldvin Hannibalson á elleftu stundu og vegna hans hafi vilja klippt nærbuxnaatriðið út. Ég skil þetta ekki, - þetta var mjög skemmtilegt atriði.“

Þá lýsti Helgi því að hann hafi orðið fyrir margvíslegu ónæði af hálfu tónlistarkonunnar vegna málsins.

Ásgerður Ragnarsdóttir héraðsdómari leit einkum til þessa og taldi að tjáning sem um er deilt rúmist innan tjáningarfrelsis Helga samkvæmt 73. grein stjórnarskrárinnar og 10. grein mannréttindasáttmála Evrópu. Takmörkun tjáningar hans með ómerkingu ummæla eða skyldu til greiðslu miskabóta telst ekki uppfylla skilyrði um nauðsyn í lýðræðislegu þjóðfélagi og hann því sýkn af öllum kröfum.

Samkvæmt upplýsingum fréttastofu hefur Leoncie þegar áfrýjað málinu til Landsréttar.

Dómsmál Tónlist Fjölmiðlar Tjáningarfrelsi

Tengdar fréttir

Mest lesið

Fleiri fréttir