Á­rásar­maður í Banka­strætis­málinu lýsir að­draganda á­rásarinnar

Málið er til rannsóknar hjá lögreglunni á höfuðborgarsvæðinu. Sakborningar í málinu telja um þrjátíu en aðeins einn sætir gæsluvarðhaldi. Karlmaður á tuttugasta aldursári sem var fyrr í vikunni úrskurðaður í áframhaldandi fjögurra vikna gæsluvarðhald.

Myndband af árásinni má sjá í spilaranum hér fyrir neðan. Myndbandið er ekki fyrir viðkvæma. 

Vinur fórnarlambanna opnaði umræðuna með færslu og kvartaði yfir því að einn þeirra fjölmörgu sem kom að árásinni á Bankastræti Club gangi laus. Vinurinn fullyrðir að maðurinn sé leiðtogi hópsins og að hann hafi viðurkennt aðild sína að málinu fyrir lögreglu. Samt sem áður hafi árásarmanninum verið sleppt þó hann sé með fleiri hnífaárásir á samviskunni. 

Stunguárás við Fjallkonuna tengist málinu

Vinur fórnarlambanna sakar árásarmanninn um að hafa stungið sig fyrir einu og hálfu ári síðan fyrir utan veitingastaðinn Fjallkonuna við Hafnarstræti í miðbæ Reykjavíkur. Vísir fjallaði um málið en lögregla hafði einnig til rannsóknar eldsvoða í bíl sem talinn var mögulega tengjast árásinni. 

Vinurinn er hneykslaður á því að árásarmaðurinn, hinn meinti leiðtogi, gangi laus.

„Þótt hann hafi stungið mig fyrir einu og hálfu ári og það mál er enn þá á lokastigi rannsóknar og búið að vera það i marga mánuði!!! Ég var í 2 vikur uppi á spítala meðan hann var 3 daga í gæsluvarðhaldi og sama gerðist aftur núna með Bankastræti málið. Hvenær ætlar lögreglan og ákæruvaldið að taka á þessu,“ segir vinur fórnarlambanna á Bankastræti Club.

Leiðtoginn meinti svarar fyrir sig í ítarlegri færslu á Facebook. Hann fer vel yfir aðdraganda árásarinnar á Bankastræti Club í nóvember. Hann vill meina að allt hafi byrjað eftir að út spurðist að hann hefði í eitt skipti hitt stelpu sem er fyrrverandi kærasta vinar fórnarlambanna þriggja á Bankastræti Club.

Eyðilögðu ökutæki fjölskyldumeðlima

Leiðtoginn meinti segir mennina hafa byrjað að ásækja sig fyrir hönd félagans. Hann sakar þá um að hafa eyðilagt ökutæki í sinni eigu og eigu nánustu fjölskyldu hans. Þá birtir hann mynd af manni míga inn um brotna afturrúðu á bíl og segir að þar hafi verið á ferðinni einn þeirra þriggja sem var stunginn á Bankastræti Club. 

Þá sakar hann sömu menn um að hafa reynt að borga fólki fyrir upplýsingar um sig og hvar hann héldi til í þeim tilgangi að ganga í skrokk á sér. 

Hann svarar um leið fyrir hnífsstunguna við Fjallkonuna. Þar hafi fórnarlömbin á Bankastræti Club og fyrrnefndur vinur ráðist að honum vel vopnaðir. Hann hafi svarað fyrir sig í sjálfsvörn. 

Sagðir hafa ráðist á ófríska konu

Eftir hnífaárásina við Fjallkonuna hafi vinahóparnir tveir náð sáttum en þó ekki lengi. Hópurinn sem tengist fórnarlömbunum á Bankastræti Club hafi ráðist á meinta leiðtogann við Ingólfstorg. Ófrísk kærasta hans hafi verið með honum í för. Þeir hafi einnig slegið til hennar. 

Að minnsta kosti einn einstaklingur var dæmdur í fangelsi fyrir þá árás eftir að maðurinn og kærastan báru vitni fyrir dómi. Sá sem var fangelsaður er hluti af vinahópi fórnarlambanna á Bankastræti Club og voru þeir afar ósáttir með vitnisburðinn. Þeir vildu að meintur leiðtogi í Bankastræti Club hefði þagað um árásina. 

„Eftir að það var búið að sættast við okkur þá kveiktuð þið í bílnum mínum og eyðilögðuð bílinn hjá foreldrum mínum, kveiktuð í öðrum vitlausum bíl í Árbænum þar sem þið hélduð að það væri bílinn hjá félaga mínum sem skipti sér af þessu máli,“ skrifar leiðtoginn meinti.

Önnur afsökunarbeiðni og aftur ósætti

Hann segir að ítrekað eftir þetta hafi hópurinn í kringum fórnarlömbin byrjað með vesen við sig og reynt að ráðast á sig. Hópur leiðtogans meinta hafi beðist afsökunar. Hann segir að þá hafi dágóður tími liðið þar til næst kom til átaka. Þá réðst maður úr hópi fórnarlambanna á vin árásarmannanna í Bankastræti. Sá var við störf sem dyravörður þegar árásin átti sér stað. Maðurinn reyndi að verja vin sinn og aftur var orðið ósætti milli hópanna tveggja. 

„Eftir þetta byrjuðu vinir þínir að nafngreina mig og pósta myndum og videoum af mér inná instagram og segja að ég væri rotta og squealer fyrir að hafa farið í dóm með kærustunni minni á þeim tima sem hún var ófrísk að kæra fyrir að hafa lamið hana með löggukylfu þegar hún var ófrísk,“ skrifar leiðtoginn. Máli sínu til stuðnings birtir hann skjáskot af hótununum sem beinst hafa að honum. 

Hann segir mennina hafa hótað sér og reynt að leita uppi kærustur manna úr hópnum. Að lokum hafi þeir fengið sig fullsadda og ráðist á mennina, 27 gegn þremur, á Bankastræti Club. 

Óhætt er að segja að átökum hópanna tveggja hafi ekki lokið þar. Má nefna að tvisvar sinnum hefur sprengju af einhverju tagi verið kastað í átt að íbúð í Hraunbæ í Árbænum í Reykjavík.