Rekinn í þriðja sinn frá sama félaginu

Pep Clotet er spænskur knattspyrnustjóri sem meðal annars hefur stýrt Birmingham, ítalska liðinu SPAL og Malmö FF í Svíþjóð. Hann tók við sem stjóri Brescia síðasta sumar en hefur nú verið sagt upp störfum og það í annað sinn á tímabilinu.

Eftir að hafa byrjað tímabilið ágætlega í haust tók erfiður tími við hjá Brescia og þann 21.desember var Pep Clotet sagt upp störfum sem þjálfara liðsins. Eftirmaður hans, Alfredo Aglietti, fékk hins vegar aðeins tækifæri í tveimur leikjum en þá virðist sem eigandi Brescia hafi séð eftir ákvörðun sinni hvað varðar Clotet og réði hann sem knattspyrnustjóra liðsins á nýjan leik um miðjan janúar fyrr á þessu ári.

Það entist þó ekki lengi. Á dögunum var Pep Clotet sagt upp störfum sem knattspyrnustjóri Brescia, í annað sinn á aðeins 48 dögum.

Þetta er þó ekki öll sagan. Pep Clotet var nefnilega fyrst ráðinn þjálfari Brescia í febrúar árið 2021 en þá lék landsliðsmaðurinn Birkir Bjarnason með liðinu. Þrátt fyrir að koma Brescia í umspilsleiki um sæti í Serie A fékk Pep Clotet ekki að halda áfram með liðið í það skiptið.

Clotet hefur því fengið sparkið í þrígang frá sama félaginu og mun eflaust hugsa sig tvisvar ef eigandinn Massimo Cellino hefur samband á nýjan leik. 

Hinn litríki Cellino er ekki ókunnugur því að tilkynna knattspyrnustjórum að þjónustu þeirra sé ekki lengur óskað. Hann var eigandi Leeds United frá janúar 2014 og þar til sumarið 2017. Á þeim tíma rak hann hvorki fleiri né færri en átta knattspyrnustjóra.