Ísland vann Georgíu á erfiðum útivelli með þremur stigum en þurfti fjögurra stiga sigur til að komast á HM og verða þar með minnsta þjóð sögunnar til að komast á mótið.
Ísland fékk lokasókn leiksins en skot Elvars, sem var frábær í leiknum líkt og fyrr í undankeppninni, rataði ekki ofan í.
„Jón Axel ræðst á körfuna og þeir falla allir inn í, og hann kemur með frábæra sendingu út, en boltinn rúllaði upp úr. Þetta er mesta svekkelsi sem ég hef upplifað,“ sagði Elvar í viðtali við RÚV.
Hann átti annars erfitt með að tjá tilfinningar sínar, tveimur mínútum eftir að hafa séð skot upp á sæti á HM fara í hringinn:
„Hausinn er bara í snúning núna og það er ekkert gáfulegt sem ég get sagt,“ sagði Elvar sem vitaskuld má vera stoltur af því hve Ísland var nálægt því að komast á HM eftir afar langa leið með ótal vörðum.
„Það er það sem svíður mest. Að standa í öllum þessum undirbúningi, allar þessar ferðir, allir þessir leikir, allt þetta fólk að leggja allt að mörkum til að komast á HM, og að ná ekki að skila þessu í höfn er frekar súrt.“
