Góð bleikjuveiði við Ásgarð

Bleikjur í stærðinni 50-60 sm voru ekkert of algengar hér á árum áður þegar undirritaður var að veiða við Ásgarð og á Bíldsfelli en vissulega veiddust þær reglulega sem og stærri bleikjur en það þótti alltaf frétt. Núna er staðan bara þannig að það þykir ekkert tiltökumál að landa bleikjum í þessari stærð. Þetta er augljós árangur af því að sleppa bleikjunni aftur og það verður spennandi að fylgjast með á næstu árum og sjá hvort það komi bleikja á fluguna sem verður 70 sm eða stærri.

Hópur sem var að ljúka veiðum við Ásgarð í gær landaði 27 bleikjum og missti eitthvað eins og gengur og gerist. Stærsta bleikjan var 62 sm og töluvert magn af bleikjunni var í 50-60 sm. Ásgarður er líklega að verða það svæði á landinu ásamt Litluá í Kelduhverfi þar sem stórar bleikjur veiðast nær daglega en það er ótrúlega gaman að eiga við stórar bleikjur því þær láta allt öðruvísi á færi en til dæmis lax eða urriði.