Norskur ráð­herra segir af sér fyrir klíku­skap

Málið snýst um tilnefningar Trettebergstuen á þremur vinum sínum í stjórnir norsku óperunnar, þjóðminjasafnsins og Þjóðarleikhússins í Björgvin. Hún lýsti manni sem hún tilnefndi í stjórn þjóðminjasafnsins sem nánum vini sínum. Fram hefur komið að hún hafi tilnefnt hann þrátt fyrir að henni væri ljóst að hún væri vanhæf.

Trettebergstuen viðurkenndi mistök sín og sagðist axla ábyrgð á þeim á blaðamannafundi í dag. Hún afsakaði sig meðal annars með því að hún hefði ekki vitað að hún mætti ekki tilnefna fólk til embætta þegar hún væri vanhæf, að sögn norska ríkisútvarpsins NRK.

Støre sagði ákvörðun Trettebergstuen um að segja af sér rétta. Hún hefði brotið reglur og sýnt vanþekkingu á reglum um vanhæfi. Hún hefði tilnefnt fólk sem hún tengdist þrátt fyrir viðvaranir ráðuneytis hennar.

Spurningar hafa einnig vaknað um hæfi Trettebergstuen þegar hún tilnefndi tvö fyrrverandi flokkssystkini sín úr Verkamannaflokknum til stjórnarsetu í Norskum getraunum í apríl í ár og í fyrra. Ráðherrann taldi sig ekki vanhæfan í tilfelli þeirra.

Fyrr í þessari viku kom á daginn að Tonje Brenna, menntamálaráðherra sem er einnig úr Verkamannaflokknum, hefði veitt góðvini sínum stjórnarsæti. Hún lýsti sig síðar vanhæfa og baðst afsökunar. Støre sagði mál Brenna og Terrebergstuen eðlisólík í dag. Það sem gerði mál Trettebergstuen meðal annars svo alvarlegt væri að launin fyrir stjórnarsetu sem hún úthlutaði nema í sumum tilfellum 90.000 norskum krónum. rúmlega 1,1 milljón íslenskra króna.