„Það hefur ekki enn liðið yfir mig“

„Flestir Íslendingar sem ég þekki hérna eru búnir að flýja land og eru komnir aftur til Íslands, svona á meðan þetta er sem verst,“ segir Borghildur, japönsku- og iðnaðarverkfræðinemi í Háskóla Íslands, í samtali við fréttastofu. Borghildur býr í Japan yfir sumartímann til að æfa sig í japönskunni þar sem hún missti af skiptinámi þangað vegna Covid-19 faraldursins.

Varað hefur verið við miklum hita í Japan en Borghildur segir að fók sé hvatt til að drekka nóg af vatni og passa sig á hitanum. Sjálf sé hún að halda sig frá lestunum vegna hitans. „Það verður svo heitt þar og það er svo mikið af fólki sem tekur lestina, það er eins og maður sé pakkaður inn í einhverja sardínudós.“

Borghildur segir að í dag hafi verið mjög heitt í borginni. Um klukkan hálf fjögur hafi verið þrjátíu og sex stiga hiti. Þó hafi veðurspáin í símanum hennar tjáð henni að það væri eins og hitinn væri fjörutíu stig. Síðustu daga hafi hitinn verið á því reiki.

 „Ég er allavega ennþá á lífi, það hefur ekki enn liðið yfir mig,“ segir Borghildur. „Það var skýjað í byrjun laugardags þannig það var alveg í lagi en um leið og sólin kemur út þá verður þetta algjörlega ómögulegt. Sérstaklega þegar maður er Íslendingur og er vanur tíu stiga sumrunum sínum þá er mjög erfitt að vera komin í þennan hita.“

Í jakkafötum þrátt fyrir hitann

Samkvæmt Borghildi bregðast Japanir nokkuð öðruvísi við hitanum en Íslendingar. Þeir breyti til að mynda ekki út af vananum þegar hitinn hækkar mikið. Fólk sé í síðbuxum og jökkum þrátt fyrir hitastigið úti. 

„Manni líður svolítið skringilega þegar maður mætir í stuttbuxum og stuttermabol og allir eru í jakkafötum í kringum þig.“

Þá segir hún að í borginni haldi fólk bara áfram með daginn sinn í svona veðri. Þá sé fólk þar með ýmsar leiðir til að kljást við hitann.

„Japanir nota rosalega mikið sólhlífar, það eru allar konur með sólhlífar. Það er hægt að fá jakka sem eru með viftum sem blása lofti upp. Síðan eru allir með blævæng og svona rafmagnsviftur, halda áfram með líf sitt einhvern veginn.“

Ekki jafn eðlilegt að sóla sig

Borghildur segir að fólk noti einnig almenningssundlaugar og fari út fyrir borgina á þessum tíma, nær ströndinni. „Það er ekki langt að næstu baðströnd þannig ef þetta verður alveg ómögulegt þá fer maður þangað. Notar tækifærið til að sóla sig.“

Það að sækjast í sólbað í Japan er þó ekki jafn eðlilegt og á Íslandi. „Þegar ég segi japönsku konunum sem ég þekki að ég ætli að fara upp á þak að sóla mig aðeins í hádegismatnum, það er eins og ég sé klikkuð,“ segir Borghildur.

„Þau vilja vera hvít. Konurnar eru alveg bara með hanska og þær líta út fyrir að vera svona býflugubændur miðað við allan búnaðinn sem þær eru að nota til að komast hjá sólinni.“