Þing­menn Sjálf­stæðis­flokksins heyrðu tíðindin á sama tíma og þjóðin

Frá þessu greinir Hildur Sverrisdóttir, þingflokksformaður Sjálfstæðisflokksins, í samtali við Vísi. Hún segir fregnirnar mikil vonbrigði

„Mér þykir Bjarni maður að meiri. Þó hann sé ósammála forsendum álitsins, þá trúi hann á samfélag þar sem beri að virða niðurstöðu sem þessa,“ segir hún.Hildur segir þó að fregnirnar komi ekki á óvart þar sem Bjarni sé mikill heiðursmaður. 

Henni finnist þó niðurstaðan ósanngjörn, vegna þess að unnið hafi verið af miklum heilindum að Íslandsbankasölunni.

„Þetta er auðvitað ákveðið áfall. Bjarni er búinn að vera framúrskarandi fjármálaráðherra og á ofboðslega mikinn þátt í því á hversu góðum stað okkar samfélag er. Ég held að við séum öll að meðtaka þetta að svo stöddu,“ segir Hildur.

Hún segir að Bjarni hafi fullan stuðning þingflokksins um hvaða frekari ákvarðanir hann taki um framtíð sína, en hann segist eiga eftir að ákveða hvort hann muni halda áfram þingmennsku eða taka við öðru ráðuneyti.

Jafnframt segist Hildur, sem þingflokksformaður Sjálfstæðisflokksins, ekki þurfa að gera neinar sérstakar ráðstafanir vegna málsins. Að minnsta kosti í fljótu bragði.