Tugir leik­manna grunaðir um brot á veð­mála­reglum

Nicoló Fagioli, leikmaður Juventus, Sandro Tonali, leikmaður Newcastle, og Nicolo Zaniolo, leikmaður Aston Villa, sæta nú rannsóknar lögreglu á Ítalíu. Þeir tveir síðastnefndu voru yfirheyrðir af lögreglu í í yfirstandandi landsliðsverkefni og voru í kjölfarið sendir heim úr ítalska landsliðshópnum.

Í dag greindu ítalskir miðlar svo frá því að að Nicola Zalewski, leikmaður Roma, væri fjórði leikmaðurinn sem væri grunaðir um brot á umræddum veðmálareglum.  

Nú greinir AP fréttaveitan frá því, og hefur meðal annars eftir ítölskum miðlum að tugir leikmanna til viðbótar gætu tengst rannsókn lögreglu á málinu og því virðast öll kurl ekki vera komin til grafar. 

Þar á meðal er einn af liðsfélögum Fagiolo hjá Juventus sagður vera undir smásjá lögreglu. 

Tonali skipti yfir til Newcastle United á Englandi frá AC Milan fyrir yfirstandandi tímabil. Zaniolo er á láni hjá Aston Villa frá tyrkneska félaginu Galatasaray á meðan að Fagioli er áfram hjá Juventus. 

Lögreglan á Ítalíu hefur gert fartölvur og farsíma þremenninganna upptæka í þágu rannsóknar málsins.