Íslendingar eiga sextán fulltrúa á mótinu en meðal þeirra verða Kári Steinn Karlsson, Andrea Kolbeinsdóttir og Baldvin Þór Magnússon.
Víðavangshlaupið fer fram við tjaldsvæðið og þvottalaugarnar í Laugardalnum í Reykjavík. Sterkir keppendur frá Danmörku, Noregi, Svíþjóð og Finnlandi mæta til leiks og etja kappi við okkar bestu hlaupara.
Kári Steinn er fyrsti íslenski karlmaðurinn sem keppt hefur í maraþonhlaupi á Ólympíuleikum en hann tók þátt árið 2012 og hafnaði hann í 42. sæti af 100 keppendum.
Andrea Kolbeinsdóttir setti tvö Íslandsmet á árinu. Í byrjun árs sló hún Íslandsmet í 5000 metra hlaupi innanhúss og í sumar sló hún Íslandsmet í 3000 metra hindrunarhlaupi á Evrópubikar í Póllandi.
Baldvin Þór Magnússon bætti Íslandsmetið í 10 kílómetra götuhlaupi fyrir skemmstu og er það fimmta Íslandsmetið sem hann slær á árinu.
Víðavangshlaup eru fyrst og fremst sveitakeppni og í öllum flokkum má senda sex hlaupara til keppni en þrír bestu innan sveitar telja til stiga. Keppt verður í sex kílómetra og níu kílómetra hlaupi.
Í beinu framhaldi af Norðurlandameistaramótinu verður haldið almenningshlaup, sem opið er öllum, þar sem hlaupurum gefst tækifæri á að hlaupa sömu braut, við sömu aðstæður og NM í víðavangshlaupum. Engin verðlaun verða veitt en það verður tímataka.

- Íslenska landsliðið á NM 2023:
- Karlar:
- Baldvin Þór Magnússon
- Búi Steinn Kárason
- Þorsteinn Roy Jóhannsson
- Snorri Björnsson
- Kári Steinn Karlsson
- Konur:
- Andrea Kolbeinsdóttir
- Anna Berglind Pálmadóttir
- Halldóra Huld Ingvarsdóttir
- Íris Anna Skúladóttir
- Sigþóra Brynja Kristjánsdóttir
- Piltar:
- Bjarki Fannar Benediktsson
- Illugi Gunnarsson
- Hilmar Ingi Bernharðsson
- Stúlkur:
- Embla Margrét Hreimsdóttir
- Helga Lilja Maack
- Guðný Lára Bjarnadóttir