Þrjú geta unnið titilinn en að­eins eitt þeirra getur fengið bikarinn í leiks­lok

Hammarby er efst með 56 stig en bæði Häcken og Linköping eru aðeins einu stigi á eftir. Eins og sést á þessu þá er spennan mjög mikil í titilbaráttunni þegar 25 leikir eru að baki.

Bikarinn sem er í boði er nefndur eftir Viktoríu krónprinsessu. Hammarby heimsækir Norrköping í lokaleiknum og þar verður bikarinn staðsettur. Hinir leikirnir sem skipta máli í titilbaráttunni fara fram á heimavelli Häcken (mætir Pitea) og á heimavelli Linköping (mætir Kristianstad).

Það er ekki langt á milli Linköping og Norrköping (35 mínútur í bíl) en mun lengra til Häcken sem er í Gautaborg.

Bikarinn fer þó aðeins á loft vinni Hammarby titilinn. Það eru ekki til eftirlíkingar af aðalbikarnum sem gæti þá verið á hinum völlunum. Það er aftur á móti til fleiri útgáfur af karlabikarnum og svona kæmi því aldrei upp hjá þeim. Það verður heldur ekki þyrla á ferðinni á milli leikstaða eins og við Íslendingar þekkjum frá árum áður.

Gert Nilsson hjá sænska knattspyrnusambandinu segir að reglan sé að bikarinn verði hjá því liði sem er efst fyrir lokaumferðina.

Vinni Häcken eða Linköping sænska titilinn um næstu helgi þá fá liðin ekki bikarinn afhentan heldur aðeins gullpeninga. Aftonbladet fjallar um málið og kannski kallar sú umfjöllun á það að sænska sambandið finni betri lausn.