Hjálmar Hallgrímsson starfar hjá lögreglunni í Grindavík.
„Fólk er að fara út úr bænum,“ segir Hjálmar. Umferð er lokuð um Grindavíkurveg vegna skemmdanna svo fólki hefur úr tveimur vegum að velja; Suðurstrandarvegi og Nesvegi.
Hjálmar segir stöðugan straum út úr bænum. Hún hafi verið mikil eftir skjálftana en eitthvað minnkað.
„Það er stöðugur straumur.“
Almannavarnir lýstu yfir hættustigi um sexleytið. Engar ákvarðanir hafa verið teknar um rýmingu. Víðir Reynisson sviðsstjóri almannavarna sagði í fréttum Stöðvar 2 að það væri engin ástæða fyrir Grindvíkinga að yfirgefa bæinn.
„Við höfum ekki farið í rýmingar enn þá. Fólk tekur bara eigin ákvarðanir. Það er ekkert óeðlilegt við þetta. Fólk fer bara í rólegheitum.“
Lögregla reyni að halda utan um hlutina í Grindavík þar sem gengur á með snörpum skjálftum. Hann er ekki meðvitaður um skemmdir í heimahúsum í bænum en miðað við skemmdirnar á Grindavíkurvegi hljóti einhverjir húsmunir að skemmst í skjálftunum.
