Rússar herða sultar­ólina

Við síðustu vaxtahækkun sögðust forsvarsmenn seðlabankans hafa áhyggjur af því að verðlag hefði hækkað um tólf prósent. Samkvæmt spám bankans er talið að verðbólga verði um 7,5 prósent út næst ár.

Í frétt AP fréttaveitunnar segir að líklega verði verðbólgan hærri í rauninni.

Einn viðmælandi fréttaveitunnar, Roxana Gheltkova, sem rætt var við í verslun í Moskvu, segir matvælaverð hafa hækkað um fjórðung. Aðspurð um hvort ellilífeyrir hennar dugði til að eiga í sig og á sagði hún svo ekki vera. Hún fengi hjálp frá börnum sínum.

Hér að neðan má sjá svör annarra Rússa sem spurðir voru út í verðlag.

Samkvæmt opinberum tölum hafa kálhausar hækkað um 74 prósent, appelsínur um 72 prósent og gúrkur um 47 prósent.

Hagkerfi Rússlands hefur verið undir miklum þrýstingi vegna innrásarinnar í Úkraínu og vegna umfangsmikilla refsiaðgerða sem Rússar hafa verið beittir vegna innrásarinnar. Áhrif þessara aðgerða á efnahag Rússlands hafa þó dregist saman að undanförnu.

Rússneska þingið samþykkti nýverið fjárlög fyrir næstu þrjú ár, 2024-2026, og eru fjárútlát til varnarmála og hergagnaframleiðslu í methæðum. Sérfræðingar segja það benda til þess að verðlag muni hækka áfram í Rússlandi.

Einn rússneskur hagfræðingur sem býr í Lettlandi sagði AP að ómögulegt væri að berjast gegn verðbólgu á meðan hergagnaframleiðsla fær endalaust fjármagn og hagkerfið vex þar af leiðandi mjög hratt.

Þar að auki hafi virði rússnesku rúblunnar lækkað, sem geri innflutning dýrari.