Hildur skoraði tvö í stór­sigri

Hildur skoraði annað og þriðja mark gestanna á sjöundu og fimmtándu mínútu leiksins eftir að Tessa Wullaert hafði komið liðinu yfir strax á þriðju mínútu.

Wullaert lagði einmitt upp fyrra mark Hildar og lagði svo einnig upp fjórða mark liðsins fyrir Feli Delacauw þegar innan við tuttugu mínútur voru liðnar af leiknum og staðan var 0-4 þegar flautað var til hálfleiks og liðin gengu til búningsherbergja.

Wullaert var þó ekki hætt því hún skoraði fimmta mark liðsins úr vítaspyrnu á 77. mínútu áður en hún fullkomnaði þrennu sína fimm mínútur síðar með marki úr annarri vítaspyrnu.

Niðurstaðan því 0-6 stórsigur Fortuna Sittard sem nú situr í öðru sæti deildarinnar með 22 stig eftir tíu leiki, tveimur stigum minna en topplið Twente sem þó hefur aðeins leikið átta leiki.