Fé­lags­fundur boðaður: Ekki skoðun hvort heppi­legt sé að myrða börn

Greint er frá fundarboðinu í færslu á vef FÁSES. Þar segir að fundurinn verði haldinn í Reykjavík miðvikudaginn 20. desember. 

Umræðuefnið verður ályktun stjórnar FÁSES sem samþykkt var fyrir helgi. Þar kom fram félagið tæki ekki afstöðu til áskorana um sniðgöngu Eurovision 2024 en hvatt hefur verið til sniðgöngu vegna þátttöku Ísrael í keppninni vegna átaka þeirra og Palestínumanna. 

„Kjósi RÚV að senda fulltrúa á Eurovision 2024 mun FÁSES, eins og hin fyrri ár, standa þétt að baki íslenska framlaginu. Stjórn FÁSES virðir afstöðu félaga til málsins,“ segir í ályktuninni. 

Ályktunin vakti litla kátínu meðal nokkurra meðlima FÁSES og hófust miklar umræður um málið inni á Facebook-hópnum Júróvisjón 2024 en það er hópur fyrir alla aðdáendur keppninnar. 

„Hver er munurinn á Ísrael og Rússlandi en eins og kemur fram í fréttinni vildi Fáses að Rússlandi yrði vikið úr keppninni á sínum tíma,“ skrifaði einn meðlima í hópinn.

Inga Auðbjörg Straumland, formaður stjórnar Siðmenntar, birti einnig færslu þar sem hún segir það miður að FÁSES vilji ekki taka afstöðu í málinu. Hún óskaði eftir því að haldinn væri félagsfundur til að ræða málið frekar. Hún fékk ósk sína uppfyllta. 

„Blíðu og stríðu“ stingur í augun

Inga tjáir sig um ályktunina í umræðum um málið á Facebook.

„Stjórnin hefur nú birt ályktun sína á vef sínum og um leið og ég skil að hér eru sjálfboðaliðar sem bjóða sig fram til forystu í félagi sem aðallega snýst um glimmer og gleði, þá verð ég að viðurkenna að ályktunin veldur mér talsverðum vonbrigðum,“ segir Inga.

„Mér finnst ekki við hæfi að nota orðalag eins og blíðu og stríðu í tilfelli þar sem verið er að framkvæma þjóðarmorð.“

Þá finnist henni undarlegt að segjast „virða afstöðu félaga til málsins“. 

„Hver er afstaðan sem stjórn segist virða? Virðir hún allar afstöður allra félaga? Það er hægt að virða fólk og rétt þeirra til að hafa alls konar afstöðu, en það er ekki mjög heillavænlegt að virða afstöðu út í loftið; afstöður sem geta falið í sér stuðning við ofbeldi og ofríki,“ segir Inga.

Ekki skoðun hvort heppilegt sé að myrða börn

Henni finnist mjög miður að stjórn FÁSES taki ekki afstöðu með mannréttindum, og sláist í lið þeirra sem skora á RÚV að nota röddina sína á alþjóðavettvangi.

Þá finnur hún frekar að texta á vef FÁSES þar sem fjallað er um ályktunina. Þar segir „að baki þessum ályktunum liggur það sjónarmið að í FÁSES er að finna breiðan hóp fólks með ólíkar skoðanir.“

Inga segir ekki beinlínis vera skoðun hvort það sé heppilegt að börn séu myrt eða ekki. 

„Vissulega á félagið að geta rúmað fólk með ólíkar skoðanir, og ef við værum að ræða hvort það ætti að vísa bæði Palestínu og Ísrael úr keppni, eða bara annarri þjóðinni, þá værum við mögulega að ræða pólitík. En staðreyndin er sú að bara önnur þjóðin fær að taka þátt í keppninni, því bara önnur þjóðin nýtur sjálfstæðis og mannréttinda. Það er dregur enga flokkspólitíska línu að krefjast þess að ríki sem framkvæmir fjöldamorð á börnum fái ekki að bleikþvo sig með popplagi fyrir allra augum.“

Hún sjái ekkert í samþykktum félagsins sem heimili ekki stjórn eða félagsfundi að álykta gegn mannréttindabrotum.  Hún hvetur til þess að FÁSES geri það með skýrum hætti, en ekki óljósum friðarboðskap.