Braut gróf­lega á konu sinni með dreifingu á kyn­ferðis­legu efni

Dómur var kveðinn upp í Landsrétti í dag en maðurinn fékk þriggja ára og níu mánaða dóm í Héraðsdómi Reykjavíkur í janúar í fyrra. Landsréttur horfði til þess hversu alvarleg og ófyrirleitin brot mannsins voru gagnvart fyrrverandi eiginkonu og barnsmóður sinni, hve lengi þau stóðu yfir og hve gríðarlega miklu tjóni þau ollu henni.

Voru brot mannsins, rúmlega 130 talsins, heimfærð undir b-lið 218. greinar almennra hegningarlaga sem fjalla um endurtekna ógn á lífi náins aðila með ofbeldi og hótunum. Héraðsdómur hafði heimfært málið undir 199. grein laganna sem snýr að stafrænu kynferðisofbeldi.

Fram kom meðal annars í dómi Landsréttar að sannað væri að maðurinn hefði sent öll skilaboð og myndefni sem ákært var fyrir og viðhaft ummæli sem þar voru til umfjöllunar. Efni skilaboðanna og myndefnisins hefðu skapað heilt yfir mikið ógnarástand fyrir konuna og langvarandi þjáningu. Með háttsemi sinni hefði hann misnotað verulega stöðu sína gagnvart konunni.

Miskabætur voru hækkaðar úr fjórum milljónum í fjóra og hálfa.

Hefði hótað birtingu mynda um langt skeið

Karlmaðurinn var dæmdur fyrir að hafa á árunum 2017 til 2019 meðal annars sent á annað hundrað tölvupósta með kynferðislegum ljósmyndum af konunni til vina og kunningja konunnar. Í sumum tilfellum var fjöldi viðtakenda fleiri tugir manna, bæði fólk sem þau þekktu og svo líka einstaka fjölmiðlar.

Í dómi héraðsdóms segir að póstarnir hafi verið til þess fallnir að særa blygðunarsemi konunnar, smána hana og móðga. Konan sagði hótanir um ofbeldi og birtingar á myndunum hafa staðið yfir í lengri tíma áður en karlmaðurinn hafi látið verða af því.

Þá var hann dæmdur fyrir að hafa sent fólkinu tengla á kynferðisleg myndskeið, birt kynferðisleg myndskeið af konunni á vefsíðum og sent henni ærumeiðandi skilaboð í gegnum Viber og Messenger. Sömuleiðis með SMS-skilaboðum og í símtölum sem konan tók sum hver upp.

Hefði lofað að eyða myndunum

Fram kemur í umfjöllun dómstólanna að fólkið hafi kynnst á netinu árið 2005 og ákveðið ári síðar að að byrja að búa saman. Hún skyldi flytjast frá heimalandi sínu í Asíu til Íslands. Þau skildu nokkru síðar, tóku aftur saman, eignuðust barn, skildu aftur en svo hafi hann í seinni tíð meira og inna dvalist á heimili konunnar.

Tölvupóstarnir innihéldu ekki aðeins kynferðislegar ljósmyndir heldur einnig gróf ummæli um eiginkonuna fyrrverandi, mörg hver af kynferðislegum toga.Karlmaðurinn neitaði sök í málinu en fram kom í máli hans að þau hefðu staðið í forsjárdeilu. Héraðsdómur taldi þó líkt og Landsréttur yfir vafa hafið að hann hefði gerst sekur um öll brotin 136 með tölu. Var litið til þess við ákvörðun refsingar hve mörg, gróf og alvarleg brotin voru.

Hann hefði sýnt barnsmóður sinni og fyrrverandi konu fullkomið virðingarleysi og rofið með grófum hætti trúnað gegn konunni. Myndirnar sem hann dreifði voru meðal annars myndir sem hún hafði sent honum frá heimalandi sínu þegar kynni voru að takast og í framhaldinu á fyrstu stigum sambandsins. Fullyrti hún að maðurinn hefði lofað að eyða myndefninu sem hefði verið tekið.

Vítaverðar hvatir mannsins

Héraðsdómur sagði í niðurstöðu sinni að vítaverðar hvatir hafi legið að baki verknaði ákærða og tengsla þeirra. Mat dómurinn það þannig að karlmaðurinn ætti sér engar málsbætur. Rannsókn málsins væri umfangsmikil og ekki hægt að líta svo á að hún hefði dregist úr hófi þótt eitt og hálft ár hafi liðið frá því rannsókn hófst og þar til ákæra var gefin út.

Gæsluvarðhald sem karlmaðurinn sætti í nokkrar vikur árið 2019, fyrst eftir handtöku erlendis og svo eftir framsal til Íslands, koma til frádráttar refsingunni. Þá var Nokia Android One sími hans og símkort gerð upptæk.Landsréttur tók undir með héraðsdómi og þyngdi refsinguna eftir að hafa heimfært brot mannsins undir þau ákvæði laganna sem snúa að líkamlegu ofbeldi í nánu sambandi en ekki stafrænt kynferðisofbeldi.

Dæmi um skilaboð karlmannsins til konunnar má sjá hér að neðan. Aðeins er um brot að ræða af þeim skilaboðum sem send voru. Lesendur eru varaðir við lestri þeirra.