Tíðindin breyti ekki af­stöðu þing­manna til málsins

Eftir að Svandís Svavarsdóttir, matvælaráðherra, greindi frá veikindum sínum í morgun ákvað Flokkur fólksins að draga til baka vantrauststillögu á hendur ráðherranum. Hvalveiðimálið og afleiðingar þess eru þó enn óleyst.

Heimir Már Pétursson ræddi við Ingu Sæland, formann Flokks fólksins og Hildi Sverrisdóttur, þingflokksformann Sjálfstæðisflokksins, um fregnirnar sem bárust í dag af matvælaráðherra og hvalveiðimálið sem er enn óleyst. Horfa má á viðtalið við þær tvær frá tímanum 2:20 í klippunni hér fyrir neðan:

Óska Svandísi góðs bata en segja málið enn óleyst

Inga Sæland, formaður Flokks fólksins, segir ekki annað hafa komið til greina en að draga vantrauststillöguna til baka. Hún segir málið hins vegar ekki hverfa á meðan Svandís háir sína baráttu.

Málið stendur eins að þið eruð ekki ánægð með hvernig staðið var að þessu hvalveiðibanni?

„Nei, að sjálfsögðu var þetta skýlaust lögbrot og vísvitandi og allt það en við fengum þessar sláandi fréttir í dag og þá var ekkert annað í stöðunni. Við munum ekki koma með vantraust nema sá einstaklingur sem vantraustið beinist að geti verið hér til að verjast því vantrausti,“ sagði Inga Sæland.

„Þess vegna óskum við Svandísi góðs bata og kærleikskveðjur til hennar akkúrat í þessari stöðu í dag. Hún er að fara að takast á við stórt og mikið verkefni en ég er ekkert að segja það að þegar hún kemur eldhress aftur, sem ég býst við að hún geri því hún vinnur alla sigra, þá náttúrulega erum við enn hér,“ sagði Inga.

Og tillagan kannski endurflutt þá?

„Það kemur í ljós og ég á frekar von á því, já,“ sagði Inga.

Afstaða Sjálfstæðisflokksins enn óljós

Hvalveiðibann Svandísar í sumar hefur verið mjög umdeilt innan raða Sjálfstæðisflokksins. Hildur Sverrisdóttir segir þingflokkinn ekki hafa verið búinn að komast að niðurstöðu um tillöguna þegar fregnir af veikindum Svandísar bárust.

Lék líf ríkisstjórarinnar á reiðiskjálfi?

„Ég verð nú að fá að byrja á að segja að okkur var öllum mjög brugðið yfir þessum vondu tíðindum matvælaráðherra sem við í þingflokknum höfðum ekki veður af fyrr en hún birti sína færslu. Ég vil fá að koma á framfæri að við óskum henni öll heilshugar alls hins besta í sínu erfiða verkefni sem er framundan,“ sagði Hildur Sverrisdóttir.

„Það er þannig að þegar við fáum þessar fréttir er þingflokksfundi okkar lokið. Við höfðum ekki náð að tæma umræðuna þannig að niðurstaða í því hvernig þingflokkurinn hygðist bregðast við lá ekki fyrir. Þannig er það bara. Mér finnst að svo komnu máli ekki rétt að fara frekar út í þá sálma hér og nú,“ sagði Hildur um afstöðu flokksins til vantrauststillögunnar.

Tíðindin breyti ekki óánægju þingflokksins

Það hefur borið á ýmsum kurr í ríkisstjórninni og í þessu samstarfi. Er þessari ríkisstjórn sitjandi á það sem eftir lifir þessa vetrar og svo næsta vetur?

„Þessi tíðindi eru ekki eðlisbreyting á því að þingflokkur Sjálfstæðisflokksins eru mjög ósáttur við hvernig til dæmis á þessu máli var haldið. Svo erum við auðvitað ósammála um ýmis mál, það vita allir,“ sagði Hildur.

„En núna framundan eru mjög stór, mikilvæg og viðkvæm málefni í íslensku samfélagi sem að krefjast athygli okkar. Ef þessi ríkisstjórn hefur gert eitthvað vel þá er það að taka stór samfélagsleg verkefni í fangið og klára þau og það er verkefnið núna,“ sagði hún að lokum.