„Ég get ekki meir“

Í þættinum er rifjaður upp atburður sem átti sér stað þann 19.desember árið 2006. Átta Danir höfðu verið sendir frá varðskipinu Triton á Zodiac-báti með dælu, að strandstað Wilson Muga. Þá gerðist það að brimið við Hvalsnes, rétt sunnan Sandgerðis, hvolfdi bátnum. Eftir það börðust Danirnir fyrir lífi sínu í tvær klukkustundir.

Þegar sex manna áhöfn þyrlunnar TF-LÍF komst á staðinn kom í ljós að aðstæður til björgunar voru á mörkum hins gerlega. Aðstæður voru einstaklega erfiðar, myrkur, stormur og slæmt skyggni. Öldurnar voru á við þriggja hæða hús. 

Um var að ræða langerfiðasta útkall þyrlusveitar Landhelgisgæslunnar fram að þessum tíma. Aðstæður voru svo erfiðar að sumir í áhöfn þyrlunnar töldu að vélin væri að fara í sjóinn.

Auðunn Kristinsson sigmaður og Hörður Ólafsson þyrlulæknir voru um borð í þyrlunni og eru viðmælendur Óttars Sveinssonar í þættinum.

„Allir voru að horfa út, en svo man ég að við sáum ljósu punktana, endurvarpið. Það var mjög gaman. Maður fann að allir voru mjög ánægðir. Við vorum búnir að finna þetta, finna þessa menn,” segir Hörður en ljóst er að það tekur gífurlega á hann að rifja atburðinn upp.

„Ég hélt að aldan væri að koma inn í þyrluna,“ segir hann á öðrum stað.

Héldu að vélin væri að fara

Þegar þyrlan kom að Dönunum var einn þeirra þegar látinn. Nætursjónaukar virkuðu ekki vegna þess hvað það var dimmt og mikil úrkoma. Auðunn var látinn síga niður í brimið til Dananna.

„Það er í raun og veru ekki fyrr en ég kem niður undir öldurnar að ég átta mig á því hvað ölduhæðin er mikil og aðstæður eru erfiðar,” rifjar Auðunn upp. 

„Við komum fljótt auga á fjóra menn í sjónum, þar af þrír sem virtust nokkuð vel á sig komnir.”

Hann náði fyrst taki á hinum aðframkomna Jon. Stuttu áður en þyrlan kom sagði Jon: „Ég get ekki meir."

En þá gerðist hið óvænta. Það var eins og vélin væri að missa hæð og lenda í sjónum. Hún var komin mjög nálægt öldutoppunum.

„Við héldum að vélin væri að fara – það var bara þannig. Við værum bara búnir að missa hana,“ segir Auðunn en hann ákvað að losa sig úr siglínunni þannig að hann drægist ekki með vélinni.

Aðspurður um hvað hafi farið í gegnum huga hans á þessari stundu segir Auðunn: 

„Þetta er svona “split second” dæmi þannig að þú í raun hugsar ekki mikið. Maður hugsar bara um að losa okkur úr gírnum svo við lendum ekki undir vélinni. Það gefst ekki tími til að hugsa þetta mikið lengra.”

Áhöfnin náði að lokum að bjarga sjö af Dönunum á lífi.

„Sá síðasti sem við náðum á lífi var helvíti kaldur og gat sig nánast ekkert hreyft. En hann var auðvitað mjög ánægður með að vera kominn um borð,” rifjar Hörður upp.

Hann ákvað að hætta í þyrlusveitinni eftir þennan atburð.

Eftir björgunina sæmdi varnarmálaráðherra Danmerkur áhöfn TF-LÍF heiðursmerki danska sjóhersins.

Útkall eru vikulegir þættir sem sýndir eru á Vísi og koma út á sunnudögum. Nálgast má alla þættina á sjónvarpssíðu Vísis hér fyrir neðan.