Svalt heimskautaloft leikur um landið

Þar segir að norðlægar áttir verði algengastar næstu daga. Víða verður él eða dálítil snjókoma en lengst af bjartviðri sunnan heiða og talsvert frost um land allt.

Á morgun nálgast þó smálægð úr vestri og veldur smá veðurhvelli, að því er segir á vef Veðurstofunnar. Þá mun hvessa talsvert úr austri og snjóar um tíma syðst á landinu.

Veðrið gæti valdið samgöngutruflunum syðra. Hvetur Veðurstofan ferðalanga til að fylgjast vel með veðri og færð. Lægðabólan fjarlægist seinnipartin og rofar þá til og lægir heldur.

Veðurhorfur á landinu næstu daga:

Á mánudag:

Norðan og norðaustan 5-13 m/s og víða él, 13-20 og snjókoma suðaustantil framan af degi, en rofar síðan til. Frost 2 til 15 stig, kaldast í innsveitum á Norðurlandi.

Á þriðjudag:

Norðvestlæg átt, 5-13 m/s og snjókoma eða él á norðanverðu landinu og allra syðst, annars úrkomulítið. Frost 3 til 18 stig, kaldast inn til landsins.

Á miðvikudag og fimmtudag:

Norðan 8-13 m/s og dálítil él víða um land, en yfirleitt bjart sunnan heiða. Kólnandi veður.

Á föstudag:

Hæg norðlæg eða breytileg átt, skýjað með köflum, en úrkomulítið og hörkufrost.

Á laugardag:

Hæg austlæg átt og skýjað, en líkur á snjókomu vestanlands. Áfram kalt í veðri.