Óðinn marka­hæstur og í Evrópusigri

Óðinn var markahæsti maður vallarins með átta mörk úr níu skotum er Kadetten vann þriggja marka sigur gegn Vojvodina, 27-24. 

Eftir að hafa verið undir stóran hluta fyrri hálfleiksins náðu Óðinn og félagar tökum á leiknum og leiddu með tveimur mörkum í hálfleik, 15-13.

Liðið hafði svo yfirhöndina allan seinni hálfleikinn og leiddi mest með sex marka mun. Eftir það var sigur þeirra aldrei í hættu og Kadetten vann að lokum þriggja marka sigur, 27-24.

Kadetten Schaffhausen situr á toppi þriðja riðils með fjögur stig eftir þrjá leiki, tveimur stigum meira en Vojvodina sem situr á botninum.

Þá varði Viktor Gísli Hallgrímsson 15 skot og var með rúmlega 31 prósent hlutfallsmarkvörslu er Nantes vann öruggan sex marka sigur gegn Hannover-Burgdorf í riðli eitt. Nantes og Hannover-Burgdorf deila nú efsta sæti riðilsins, bæði lið með fjögur stig.