Valinn í lands­liðið út af nafni frekar en frammi­stöðu

Brasilíska karlalandsliðið í knattspyrnu mætir Englandi og Spáni í vináttulandsleikjum síðar í þessum mánuði. Þó að um vináttuleiki sé að ræða eru fjöldinn allur af gríðarlega sterkum leikmönnum í hópnum.

Þar má til að mynda nefna Ederson, Marquinhos, Casemiro, Rodrygo og Vinícius Júnior sem dæmi. Þá eru nokkur minni nöfn í hópnum en þar sker eitt nafn sig úr. Það er varnarmaðurinn hinn 26 ára gamli Murilo sem leikur með Palmeiras í heimalandinu.

Ástæðan fyrir að Murilo sker sig hvað mest úr er einfaldlega sú að hann átti ekki yfir höfuð að vera í hópnum. Brasilískir fjölmiðlar hafa nú greint frá því að hinn 21 árs gamli Murillo, varnarmaður Nottingham Forest, hafi átt að vera í hópnum en um stafsetningarvillu hafi verið að ræða og rangur maður kallaður inn.

Hvorki Murilo né Murillo hafa leikið fyrir A-landslið Brasilíu.