Vísir hefur fylgst vel með gangi mála í máli Kamila Valieva en þessi tánings skautadrottning var fyrr á þessu ári dæmd í fjögurra ára keppnisbann vegna lyfjabrota.
Undir lok árs 2021 fannst hjartalyfið trimetazidine í blóðprufu hennar. Nú hefur BBC, breska ríkisútvarpið, greint frá því að alls hafi táningsstúlkan Valieva fengið 56 mismunandi lyf, næringar- og fæðubótaefni frá því hún var 13 til 15 ára. Ekkert af þeim hafi þó verið á bannlista Alþjóða lyfjaeftirlitsins (WADA).
Í skjölum CAS um málið kemur fram að FMBA, lyfjastofnun í Rússlandi, hafi skrifað upp á lyfin 56 sem Valieva tók. Í yfirlýsingu frá Rússneska lyfjaeftirlitinu (Rusada) kom fram að óháð rannsókn þeirra á lyfjagjöf táningsins sýndi fram á að ekki væri um nein ólögleg lyf að ræða. WADA svaraði um hæl og sagði „lyfjamisnotkun barna er með öllu ólíðandi.“
Kamila Valieva: Russian figure skater given 56 medications and supplements over two years https://t.co/TWKMBU22ZT
— BBC News (World) (@BBCWorld) March 14, 2024
Framkvæmdastjóri WADA, Olivier Niggli, sagði í viðtali að málið væri gríðarlega súrt þar sem það væri ljóst að hér hefði ákvörðun verið tekin um að refsa íþróttamanneskjunni frekar en þeim sem hjálpuðu henni að dópa.
Valieva var dæmd í fjögurra ára keppnisbann en þar sem það er afturvirkt og byrjaði í raun eftir að hún féll á lyfjaprófi undir lok árs 2021 má Valieva byrja að keppa að nýju í lok árs 2025.
