Samningar við sjó­menn til níu ára í höfn

Þetta kemur fram í tilkynningu á vef SFS, þar sem segir að Sjómannafélag Íslands hafi samþykkt kjarasamning nú síðast við SFS með 61 prósent atkvæða.

Þar áður hafi Sjómannasamband Íslands (SSÍ), Sjómanna- og vélstjórafélag Grindavíkur (SVG), VM - Félag vélstjóra og málmtæknimanna (VM) og Félag skipstjórnarmanna (FS) samþykkt kjarasamninga við SFS.

„Það er sannkallað fagnaðarefni að samningar við sjómenn séu í höfn til næstu níu ára. Það eykur á fyrirsjáanleika sem tryggir hagsmuni okkar allra sem vinnum í þessari grein, ekki síst sjómannanna sjálfra,“ er haft eftir Heiðrúnu Lind Marteinsdóttur, framkvæmdastjóri SFS.

Þá segir að megininntak samningsins lúti að betri kjörum og réttindum til framtíðar, auk hnitmiðaðra aðgerða til að auka traust við skipti á verðmætum úr sjó. Greiðslur í lífeyrissjóð og kauptrygging hækka í samræmi við samninga á almennum vinnumarkaði, auk þess sem áhersla er lögð á aukið gagnsæi og upplýsingagjöf vegna fiskverðsmála.