Tekur til varna eftir stuðningsyfirlýsingu við Katrínu

Innan við þrjár vikur eru til kosninga og hiti að færast í umræðuna. Ekki síst á Facebook þar sem umræða um Katrínu Jakobsdóttur hefur verið mikil. Yfirlýstur stuðningur Víðis Reynissonar, Kára Stefánssonar og Þórólfs Guðnasonar fór öfugt ofan í margan og hið sama má segja þegar Vilhjálmur uppfærði prófílmynd sína með borðanum: Kjósum Katrínu.

„Ég get ekki orða bundist yfir sumum athugasemdum sem birtust undir mynd þar sem fram kom að ég ætli persónulega að styðja Katrínu Jakobsdóttur í komandi kosningum til embættis forseta Íslands. Það er sorglegt og dapurlegt að verða vitni að því að sumt fólk skuli ekki virða sjálfstæðan rétt hjá hverjum þeim sem hefur kosningarrétt til að ákveða hvaða aðila það treystir best til að gegna þessu mikilvæga embætti sem forsetaembættið er,“ segir Vilhjálmur.

„Aldrei myndi ég skipta mér af því hvaða aðila fólk ætlar að styðja opinberlega til embættis forseta Íslands, enda kemur mér það ekkert við. Munum að virða sjálfstæðan rétt hjá hverjum og einum að ákveða hvern frambjóðenda það mun styðja.“

Hann segist aldrei munu taka þá í því að ata skoðun annarra eða aðra frambjóðendur auri.

„Ég mun aldrei taka þátt í slíku enda virði ég ætíð sjálfstæðan rétt hvers og eins til að hafa sína skoðun. Hins vegar er ekkert að því að skiptast málefnalega á skoðunum um frambjóðendur en ég geri þá lágmarkskröfu að það byggist á málefnalegum forsendum og án skítkasts. Ég vil taka það skýrt fram að ég deili ekki sömu pólitísku skoðunum og Katrín í mörgum málum þrátt fyrir það tel ég hana góðan kost fyrir íslensku þjóðina sem forseta Íslands.“

Vilhjálmur lýsir samskiptum sínum við Katrínu undanfarin ár og fer yfir kosti hennar.

„Það sem ég tel best í hennar fari er að hún er alþýðuleg, laus við hroka, yfirlæti og snobb sem því miður einkennir sumt fólk sem hefur mikil völd og því til viðbótar virðist Katrín eiga afar gott með að leiða saman og vinna með fólki með ólíkar skoðanir.“

Eins og gengur er viðbrögðin við færslu Vilhjálms misjöfn eftir því hvort fólki líst vel á framboð Katrínar eða ekki. Hún hefur iðullega mælst með næstmest fylgi frambjóðenda í könnunum undanfarið en þá hefur komið fram að mörgum líst alls ekki á Katrínu í embættið.