Fjölnismenn hafa náð í tíu stig í fyrstu fjórum leikjum sínum og komust með þessum sigri einu stigi upp fyrir Njarðvík sem er með fullt hús en hefur leikið leik færra.
Staðan var marklaus í hálfleik en tvö mörk á fimm mínútum komu Fjölnisliðinu í góð mál.
Guðmundur Karl Guðmundsson skoraði það fyrra á 52. mínútu en Axel Freyr Harðarson það síðara á 57. mínútu.
Fjölnismenn innsigluðu síðan sigur sinn þegar Máni Austmann Hilmarsson skoraði þriðja markið á 72. mínútu en markið skoraði hann úr vítaspyrnu.
Þróttarar gáfust þó ekki upp því Izaro Abella Sanchez minnkaði muninn aðeins tveimur mínútum síðar.
Þróttarar byrja ekki vel og hafa aðeins náð í eitt stig út úr fjórum fyrstu leikjum sínum. Liðið situr í fallsæti með jafnmörg stig og botnlið Aftureldingar.
