Hér má hlusta á lagið Merki:
„Þetta verkefni var ótrúlega skemmtilegt en rosa krefjandi líka. Þetta er fyrsta leikhúsverkefnið mitt. Þetta er þungt verk og það var heiður að fá að semja tónverk fyrir svona mikilvæga sýningu,“ segir gugusar sem heitir réttu nafni Guðlaug Sóley.
Nýtti persónulega reynslu í lagasmíðina
Gugusar hefur komið víða að í tónlistarbransanum og byrjaði þrettán ára gömul að semja.
„Þetta er fyrsta lag sem ég mixa sjálf. Ég vildi fá að prófa það en það var krefjandi og langt ferli. Það var margt sem ég þurfti að læra til þess að mixa,“ segir Gugusar en hún hefur fram að þessu alltaf pródúserað og samið efnið sitt sjálf en fengið aðstoð við lokaferlið.
„Ég er mjög fegin að það sé komið út núna. Fólk er búið að senda á mig, Ebbu Katrínu og Þóru leikstjórann hvenær lagið komi út og það er gaman að heyra að fólk vilji heyra það aftur. Svo það er gott að koma því út.
Á sama tíma gat verið erfitt að horfa til baka sem þolandi ofbeldis og nýta mína persónulega reynslu til að semja fyrir leikhúsið. Ég held að það hafi tekist vel þar sem ég skrifaði beint frá hjartanu. Ég er mjög stolt af þessu verkefni.“
Vanari því að vinna ein
Ásamt því að spila víða hérlendis og erlendis hefur Gugusar tekið upp tvær plötur og hlotið ýmsar tilnefningar og verðlaun fyrir tónlist sína. Hún segist þakklát fyrir þá áskorun sem leikhúsið var.
„Þetta var svo skemmtilegt verkefni og ég sakna þess strax. Það var svo gaman að breyta hugmyndum yfir í lög og sjá það svo lifna við á sviðinu. Það er gaman að fá að gera tónlist fyrir einhvern annan heim sem ég er óvön að gera og að fá að vinna með öðru fólki. Ég vinn mikið tónlistina mína ein svo það er gaman að fá athugasemdir og breyta til og svona.“
Það er ýmislegt á döfinni hjá þessari tónlistarkonu.
„Ég ætla að halda áfram að sinna tónlistinni í sumar. Ég er á fullu að vinna í heilli plötu fyrir alla tónlistina sem ég samdi fyrir Orð gegn orði. Mig langar að gefa hana út með öllum lögum í sýningunni og einnig með demóum úr sama hljóðheimi sem er ekki að finna í sýningunni.
Annars er ég líka að vinna í annarri plötu fyrir Gugusar. Ég hlakka til að gefa út meiri tónlist og gigga í sumar,“ segir Gugusar full tilhlökkunar að lokum.
Gugusar var viðmælandi í Vísisþáttunum Kúnst í fyrra. Viðtalið má sjá í spilaranum hér fyrir neðan:
